Aizawl: Sairang thlenga rel a lo luh tak avangin Inner Line Permit (ILP) check point thuam chak a tichangtlung turin Mizo Students’ Union (MSU) hruaituten Ningani khan Home Minister K. Sapdanga an ngen.
MSU hruaitute’n Home Minister K Sapdanga chu a pisa-ah an kawm a. Mizoram chhung, Sairang thlenga rel a lo luh tak avangin hnam dangin an chim nasa dawn tih an sawi a. Mizo mipui him tlan zawk nan ILP check point thuam chak a, tihchangtlun a nih theih nan hma la turin an ngen.
Sairang thlenga rel lo lut turah hian Sihhmuiah chauh ni lo, Sihhmui leh Phunchawng inkarah ILP khauh taka check a nih theih nan ILP check point siam turte, ILP check point ni lo, a ruka lo lutte an awm theih venthawn thilah Serkhanah pawh ILP check point a awm theih nan hma lakpui tura an ngen bawk.
MSU hruaitute chuan Mizoram rawn tlawhtu khualzinten ILP kalphung mumal leh tha zawk an neih theih nana hma la turin leh, tourist te tan bika hman theih tur Tourist ILP a hranpaa duan a nih theih nan Temporary ILP neih mek chu ennawna siam that a nih theih nan an thlen bawk.
Home Minister chuan MSU hruaitute ngenna leh an thu thlente chu tha a tih thu leh hma lak a tum thu a lo hrilh a. Tourist ILP chungchangah Tourism Department changtu Minister chu rawtna an neih theih nan sawipui a tum thu a lo hrilh bawk.