- Dr. J.T. Vanlalngheta; ECM, IIPA, Mzr Rgnl Branch, c/o Dept. of Pub. Admn, MZU
Chanchinbu lamah ‘MZU-a finance officer lak a nih dan thawktute leh zir laite’n an duh lo’ tih thu te kan lo chhiar a, ngaihtuahna a ti thui hle.
State University aia Central University neih a nih zawk theih nana theih ang anga ngaihtuahna sengtu ka lo ni ve thin, tunah sawi vek erawh chu ka tum lo; mahni ta anga enin hma a sawn nan, mahni phak tawkah kan lo tang ve reng a ni. 1996-ah khan Pu B.Laltanpuia-tehovin Shillong-a Seminar an buatsaihah khan (UPSC Civil Services Main exam lai laiin!) ka tel ve a, seminar tha leh ropui tak a ni a, kha Workshop khan MZU, Centre ta a nih tak naah pawh kawng ro a su hle niin a lang (Pui theitu CM Pu Hawla hmin thluk theih dan chungchangte pawh sawi ho a nih kha), chumi hnuah chanchinbuah te kum 1996-ah khan ka lo thai ve tawh bawk a ni. Hei bak pawh hi ka phak tawkah theih ang angin hma ka lo la ve thin a ni.
Kum 2001 atanga ding ta, kan MZU hian result tha chhuahin, kum 2025 a lo inher chhiah meuh chuan, Indian Institute of Ranking Framework (IIRF) survey angin, India rama Varsity tha ber zinga rawn invawrh chho zelin 25-na a rawn hauh phak a, kan lo lawm hle a ni. Chuvang chuan, a hna thawh chhoh zel hi kan lo chîk ve zel a. A hna lak kawng zawh hi tluang purh chu a ni lem lo; mahse, harsatnatna awm ang angte a su kiang thei zel nia a lang hi a hlawhtlinna leh Varsity tha a nih theihna chu a ni.
Tuna an harsatna nia lang pawh hi tha tak rawn zi chhuak turah ngai ila. Tlem lai deuh khan, hna lak chungchangah thawm a rawn nei zauh a, lak tawh han suta han tih that leh tih ang te pawh a awm niin a lang. Kan Central University neih chhun hian hma lam a pan zelna kawngah theih thawp chhuah zelin hna lak chungchangah te pawh a fimkhur deuh deuh a ngai hle. State University kan neih hunah pawh kawng hrang hranga kan entawn tur a ni. Sulhnu tha an hnutchhiah chuan State of Mizoram University-in u zâwk (a siam dan inang lo, Statutory Law: State Act leh Central Act mah ni se), chhun tur tha a nei dawn tihna a ni ang a, sulhnu chhia a hnutchhiah vaih erawh chuan State University tan pawh a tha dawn lo a ni. Chuvangin, Institution tha entirna zinga pawimawh em em: hna lak reng rengah fimkhur lehzual turin ka’n ngenin ka’n inchah ve a, Mizoram hma sawn nan, thalai lehkha thiam, Chanchin tha hril, ram leh hnam tana chhenfakawm tak takte chher chhuak zela hma lam pan zel turin laina induhdakin duhsakna kan hlan e.