Khawvel hmasawnna bul innghahna pakhat chu inkalpawhna (communication) tha hi a ni a. Keini tlangram hriam takah hi chuan inkalpawhna tha hi neih a har hle. Hun rei tak hmasawn hlei thei lo va kan awm pawh hi kal kawng tha kan neih loh vang a ni.
Mahse, khawvel hmasawn zelah kan ramah inkalpawhna tha kan lo nei dawn hnai ta a. Rel kawng in min rawn luhchilh tawh a. Tunah Aizawl bul mai a lo thleng tawh. Hun reiloteah hian chhim tawp kan tih mai Hmawngbu thleng rel kawng hi a kal dawn a. Chhim leh hmar zawngin kan ram chu a hawlhtlang dawn a ni. Khawchhak lamah Myanmar ramri thleng bakah Myanmar ramchhung thlengin India sorkar hian kawng a lai tawh bawk. Hmanlaia kal harsa kan tih chin kha darkar rei loteah kan thleng zung zung tawh dawn.
Hetianga kan rama kal kawng kan neih that chuan chet vel a awlsam tawh dawn avangin mihring pawhin hma kan sawn ngei turah kan beisei tawh dawn a ni.
Chutih rual erawh chuan kan ramin hma a sawn rual hian Mizote hian engtinnge a zar kan lo zo ve ang tih hi kan ngaihtuah a ngai ve ta. Rel lo lut chuan retheihna lak atangin min chhanchhuak ngawt dawn si lo. Tih ve tur kan nei. Kan ram atanga relin a phurhchhuah tur, kan hausakna ve tur, midang hnen atanga pawisa kan lakluhna tur kan lo inruahman ve a ngai. Vairamah khuan rel kawngsirah mirethei an tam khawp mai. Rel in a kal pawh hi retheih lohna a nih ngawt lohzia tilang chiangtu vai mirethei te dinhmun hi hre reng ila. Hmasawnna lama chak taka ke pen turin, relkawng sira retheite dinhmun atang hian rilru i siam ang u. Mipuiin rilru tha leh dik pu in, hmasawnna lam hawi ila, kan sorkar hian he rel lokal turah hian mipuite eng angin nge min kaihhruai dawn tih pawh sorkar hian policy fel tak a neih thuai thuai a ngai a ni.