Aizawl: Pachhunga University College (PUC)-a Department of Zoology chuan sazu puangin natna hrang hrang, a bikin rannung seh (scrub typhus) natna a pu darh nasa tih sawiin fimkhur turin mi tin an chah.
Thuchhuah an siamah, Mizoram hmun hrang hrangah sazu puang leh buh eitu an tam thute, tur hmanga hrai tuma hmalakna a awm thute chanchinthar lamah a lang a. PUC-a thawkte leh khawvel ram danga mi thiamte zir chiannaa tar lan a nih dan chuan, sazu-te hian natna hrang hrang an pu darh thin a, a bik takin Mizoramah rannung seh (Scrub typhus) natna a pu darh nasa tih finfiah a ni tawh tih an sawi a. Mizoram buh eitu sazute tura hrai emaw, thang hmanga awk emaw, silai leh hmanraw dang hmanga suat tumtute chu kut lawnga khawih lo tur leh thuamhnawa sazu hrik a kai lohna tura fimkhur turin an chah a ni.
Health & Family Welfare department pawhin tunlai hian hmun hrang hranga sazu puangin natna a put darh avangin fimkhur turin mipui an chah.
Nimina an thuchhuahah tunlai hian Rawthing (mau) tam vangin sazu a puang tih sawiin, Lunglei district a Mamte leh Lungrang khuaah te, Serchhip district a Khawbel khuaah te leh hmun hrang hrangah chuan buh an seh chhiat vangin tura hrai te a ni a. Sazu hian mihringa natna chi hrang hrang thlen theitu natna hrik eng emaw zah an pu darh thin tih an tar lang.
Heng natna hrang hrangte hi khawsik, tha na, tihrawl na, chau, thalbe vung, pumna leh kawthalo, luak, ruhchuktuah vung leh na leh taksa durh leh pan te a ni a. Natna/insawiselna nei chuan nunna atan a hlauhawm avangin a rang thei ang bera doctor inentir turin a chah.
Health & Family department chuan natna kai lo tura inven that a ngai a, in leh a vel vawn fai te, inchhunga sazu luh theihna tur kua leh awng tih phui te, ei leh in ningnawi paihna felfai tak siam leh sazu luh theih lohna tura siam te, thang/sazu ban kam te leh a tul chuan tur (rat poison) hman te a ni. A nung lai an man emaw, a thi an khawih dawn a nih pawhin kut lawnga khawih loh turin an chah a ni.