2026 FIFA World Cup chu Canada, Mexico leh United States-ah khelh a ni dawn a, qualifying an khel mek a, hetiang karah hian champion hlui, Spain chuan FIFA hnenah Israel an tling a nih chuan World Cup khelh loh an duh thu an hrilh.
A vawi khatna atan khawvela football hmanga infiamna ropui ber, FIFA World Cup chu ram pathumin an inthlen tawm dawn a. Spain chu champion thei tura rin kai ber pawl an ni mek a, qualifying an khelh tawh chinah pawh an che tha hle bawk.
Hetiang hi boruak a nih mek laiin Spain hian ngaihtheih loh deuh mai an nei a, an ram sorkar chuan FIFA hnenah thu thawnin World Cup khel turin tling mah se an khelh loh mai theih thuin an vau a ni.
Israel chu qualifying khelh mekah an group-ah pathumna an ni a, playoff khel thei dinhmunah an ding thei dawn a. An group-a pakhatna, Norway aiin point rukin an hniam a, pahnihnaa awm, Italy nen erawh an point a inang a, vawi thum khelh tur a la awm a ni.
Group champion theuhte chu World Cup khel tur hian an tling thei nghal dawn a, pahnihnate chuan playoff an khel ang a, an la tling ve leh thei dawn bawk a ni.
Spain Prime Minister Pedro Sanchez chuan Gaza laka an chet dan avangin Israel chu khawvel huap infiamna chi hrang hranga tel lo tura an duh thu a sawi a. Kum 2022-a Ukraine an rûn avanga FIFA leh UEFA-in Russia an hrem ang khan FIFA pawhin Israel chu hrem ve se an duh thu a sawi.
Israel hi World Cup khel thei tura an tling a nih a, FIFA-in tel an phalsak a nih chuan Spain chuan inhnuhdawh an tum thu Sanchez-a hian a sawi a. FIFA leh UEFA chuan an la chhang let ve rih lo thung.