Ram pum huapa faina beihpui thlak kalpuina, faina hapna leh faina hnatlang runpui chu nimin khan UD&PA Minister K Sapdanga’n a hawng.
MINECO Open Gym kawttualah ram pum huapa faina beihpui thlakna, ‘Swachhata Hi Seva’ hawnna inkhawmah UD&PA minister chuan faina chungchangah inzirna ang zawng chuan hmalakna duhthusama tam awm tawh a. Tuna an tih tur ni ta chu faina hi mi tinin an nunpui theuh a, an chenchilh a ngai tawh tih a sawi.
K Sapdanga chuan faina hapta an hman chhungin khua leh tuite chuan an awmna hmun theuhah phur takin faina kawngah hma la theuh tura sawmin, faina hapta a liam hnu pawhin faina an ngaih pawimawh chhunzawm zela an ni tin khawsaknaahte faina an nunpui chhunzawm zel a pawimawh tih a sawi.
Inkhawm hi UD&PA Secretary Lalmalsawma Pachuau-in a kaihruai a. PHE Secretary Teresy Vanlalhruaii chuan Sanitation & Cleanliness kaihhnawih allied department-te fuihna thu a sawi a. Department dang zawng zawngte pawh he hmalaknaah tel vek tur leh tha thawh turin a ngen.
Inkhawmah hian HDFC Bank-in CSR Fund kaltlangin khawlaia bawlhlawh hip khawmna lirthei – Garbage Vacuum Truck chu UD&PA minister hnenah an hlan nghal bawk.
Faina hapta hawnna inkhawm neih zawhah hnatlang runpui hawnna atan MINECO huam chhungah hmun li-ah hnatlan nghal a ni.
Mahatma Gandhi pian champha, October 2 thlengin faina hnatlangpui hi neih tur niin, ‘Ek Din, Ek Ghanta, Ek Saath’ tia hming phuah a ni.