Aizawl: Mizoram tlawha lo zin, US Consulate General, Kolkata-a Consul General Kathy Giles Diaz chuan Mizoramah US company-te tana investment kalpui theihna chi a awm a nih chuan a tul anga tanpui a inhuam thu Chief Minister Lalduhoma a hrilh.
Ningani khan US Consul General Diaz chuan chief minister chu a pisaah a kawm a. An inkawmnaah hian Diaz hian Mizoram chu mawi a tih thu leh tlawh a châk thin thu a sawi a. US-ah Mizo hnahthlak tam tak an awm a, an awmna hmunah khua leh tui tha an ni zel a. Chutianga inzawmna tha tak nei an nih avangin Mizoram tlawh a châk zual tih a sawi a. Mizoramah US company-te tana investment kalpui theihna chi a awm a nih chuan a tul anga tanpui a inhuam thu a sawi bawk.
Chief minister chuan investment lama Mizoram tanpui a inhuamnaah lawmthu hrilhin, foreign funding hmalakna lam chi reng reng chu central sorkar remtihna hnuaia kalpui vek a nih thu a sawi a. Mizo hnahthlak US a cheng an tam tawh avangin Mizoram mipuite zingah US tlawh duh an tam ve tial tial a. Inpawh taka an thawhho a tul tih a sawi.