Manipur-a Imphal Valley district pathum atangin dan pawna hnawl hel pawl pathuma tel mi paruk man an ni tih Pathianni khan police-in an sawi.
Pakhat hi People’s Liberation Army (PLA)-a tel niin Kumbi Bazar, Bishnupur district-ah Zirtawpni khan man a ni a. Kum 49 mi, Nongmaithem Gyaneshwor Singh-a niin an pawl veivahna vel tur lo duanga hrilh thintu niin police thuchhuah chuan a tar lang.
Lamdeng Mayai Leikai, Imphal West district-ah Inrinni khan mi pakhat man a ni bawk a, ani hi kum 56 mi, Laishram Jiten Singh-a a ni.
Khurai Konsam Leikai, Imphal East district-ah mi dang pakhat man a ni bawk a. Ani hi kum 50 mi, Moirangthem Chaobi Singh-a niin tun hma lama venhim hna thawktute dodal zawnga khawsa tura mipuite fuih thintu nia hriat a ni.
NRFM-a tel hmeichhe pakhat, Mantripukhri Friends Colony, Imphal East district-ah man a ni bawk a. Ani hi kum 55 mi, Khaidem Sunila Devi-i a ni.
Dan pawna dah mek, Kangleipak Communist Party (Noyon)-a tel mi pahnih chu Lilong, Thoubal district leh Naorem Leikai, Imphal West district-ah Inrinni khan man an ni bawk.
Anni hi kum 44 mi ve ve, Md Mujibur Rahaman leh Sorenshangbam Bungcha te niin .32 pistol leh a magazine pakhat an kawl chu man tel a ni tih police-in an sawi.