Harry Kane chuan Bayern Munich tan goal hnih a thun leh a, Europe khawmualpuia club pakhat tana goal 100 thun rang ber a ni a. A hmaa Cristiano Ronaldo leh Erling Haaland te record lo siam chu a khum.
Bayern hian Zirtawpni zan khan 4-0-in Werder Bremen an hneh a, he inkhelah hian England striker hian goal hnih a thun a. A goal thun hmasak chu Bundesliga club tana goal 99 a thunna niin, a goal hnihna chu a goal 100-na a ni a, record thar hi a siam theih phah a ni.
German club tana goal 100 thun tur hian Kane hian vawi 104 khelh a mamawh a, a hmaa club pakhat tana vawi 105 khela goal 100 thun record awm mek, Real Madrid tana Ronaldo record siam leh Manchester City tana Haaland siam te chu a khum ta chiah a ni.
Kane hian kum 2023 khan Tottenham Hotspurs chhuahsanin Bayern hi a zawm a, mi tam tak chuan Bundesliga huangah chuan a chet fuh theih an rin loh thu an sawi nasa a. Kum 32 mi hian mi rin lohna chu khelmualah chhang letin goal a thun mawlh mawlh reng mai a ni.
England captain hi season kal mekah a che tha a, vawi riat khelhah goal 15 a thun tawh a. Germany-a a insawn hnuah hian a zawnin Bundesliga top scorer a nih theih bakah Champions League top scorer a ni bawk.
Bundesliga season kal mekah Bayern hi vawi nga khelhah an la chak vek a, anmahni hnaih bertu, Borussia Dortmund aiin point ngain an sang mek a, vawi khatin an la khel tlem zawk bawk a. Inelna hrang hrangah a zawna vawi riat an chakna a ni tawh a, Kane chu an chet that theihna pawimawh tak a ni.
Tottenham tan khan Kane hian vawi 380 khelin goal 269 a thun hman a, Spurs tana goal thun hnem ber record a siam a. England tan pawh vawi 109 a khelhah goal 74 a thun a, an ram tana goal thun hnem ber record a siam bawk.