Mizoram chief minister Pu Lalduhawma chuan an party office a a thusawiah, “Tha kan tih angin ro kan rel ve ang, rel pui vak kan ngai lo. Party dang rorelah te, NGO rorelah te kan inrawlh lo. Anmahni purview a ni a, kan va inrawlh lo. Mipuiin rorel turin mi thlang tling a. MLA 27 ten tha kan tih angin ro kan rel dawn, lo sawi lo sawi tur a awm lo” tia a sawi chuan Zoram titi a luah hle mai.
He thusawi hi a chang khel khawl hle a. Eng thusawi ber a chhanna nge tih hriat a har a. Kan ram politics vir vel chungchanga social media a anmahni sawichhiatna a chhanna nge ni a opposition lam a chhanna hriat a ni lo va. Engpawh nise, na taka tute emaw khakna chu a ni ngei mai.
Kan chief minister tawngkam hi ngaihthlak chianin thinrim tawngka te pawh a ang a. Mawhphurhna lian ber kengtu, mi zawng zawng aiawh, kohhran mite atanga khawlaia KS vak vel zawng zawng ai pawh awh a ni tih hi a theihnghilh ta mai emaw tih tur a ni a. He ramah hian hetianga hotupa ber thinrim tawngka hi kan la dawng ngai lova. Mipui ngaihdan chu hunin a la rawn hril turah ngai ila.
Democracy ram, inthlang ram ka ni. Hruaituah pawh mipui hi ka thik thu a chhe hle. Pa rilru nem, mi zawng zawng huapa ngaihthlak hahdam taka thusawi turah pawh kan beisei a ni. Chuti ni lova hetianga a tawngchhuak mai hi a pawi hle. Kan CM hian kohhran mipui ai pawh a awh a, khawlaia rui vak vel mai mai thleng hian an ai a awh a. Thinrim tawngka hetiang a lek ta mai hi tunhnuah chuan ching tawh lo se a tha khawp mai. Hotupa berin hetiang tawngkam thinrima a au pui duh chuan khawlaia tlangval hawklakte leh zuruite tawngkam awm lek ram hotu ina hman hi a zahthlak hle a ni. Thinrim tawngkam hian tumah a siamtha ngai si lo tihte hi thurawn pe thei chuan hrilh mawlh teh se.