Aizawl: MPCC Vice President John Rotluangliana chuan ZPM party mi thenkhatin social media-ah Congress sorkarin engmah ti lo anga an chhuah chu tha a tih loh thu sawiin, Mizoram hmasawnna hnathawh tam ber chu Congress sorkar hun laia din deuh vek a nih thu a sawi.
Inrinnia Champhai South Block Congress in Champhai venglaia Congress Bhavan-a Political Training an buatsaih a hmanpuinaah John Rotluangliana chuan, ZPM sorkar-a a hre tlem tlem hi a hman hman emaw tih turin social media-ah Congress sorkarin engmah ti lo anga an chhuah chu tha a tih loh thu a sawi a. Lengpui Airport te, ZMC&H an tih takte, Rajiv Gandhi Stadium te leh hmasawnna hnathawh lian tham zawng zawng chu Congress sorkar hun laia din deuh vek a nih thu a sawi a. AMC pawh an din a nih thu leh tuna Sairang thleng rel lo lut pawh hi Congress sorkar laia an bultan a nih thu a sawi.
Dampa bial by-election lo awm tura Congress candidate John Rotluangliana chuan ZPM sorkar chu an ti ang an tih an ti lo va, an ti lo ang an ti an tifai vek tih sawiin, ZPM kaihhruaina hnuaiah pawisa leng vak a tlem a, dawt leng vak a tam thung tih a sawi a. Tunah hian Congress party tan êng a lang tan tawh tih sawiin beiseina an nei sang a, an beisei angin Pathian pawhin a thlen tir ang tih ring turin party mite a chah.
Inkhawmah hian MPCC thupuangtu Dr. Lallianchhunga pawhin thu sawiin, Congress party chuan sorkar tha, khawngaihna leh hmangaihna nei sorkar; Lal hrawt sorkar ni lo hi siam an tum tih a sawi a. MNF President Zoramthanga hi MNF party-ah a insawh nghet tulh tulh a, party mipui erawh an phur lo telh telh nia a lan thu a sawi bawk.