Aizawl: MNF Sr Vice President Dr R Lalthangliana’n ZPM kaihhruai Mizoram sorkarin road maintenance cess a lak chu a hmanna puangzar turin a phut.
Dampa bial by-election neih tura MNF candidate ni bawk Dr R Lalthangliana chuan Inrinni khan West Phaileng tlawhin, MNF party hruaitute nen an inkawmnaah ZPM kaihhruai sorkar chuan sorkar kal tawhte la tih ve ngai loh, nikum September atang khan tuialhtheih atanga chhiah la tharin, petrol leh diesel litre khat zelah cess chi hnih – social infrastructure cess cheng hnih leh road maintenance cess atan cheng hnih, a vaiin litre khatah cheng li an lak chu mipuiin a hmanna an hriat loh avangin sorkar chu cess a hmanna puangzar turin a phut tih a sawi.
Dr R Lalthangliana chuan a hriat chinah chhiah lak tlingkhawm hi Rs vbc 51 chuang daih tawh niin, tunah phei chuan a tam belh tawh hial dawn tih sawiin, “Road maintenance atana chhiah chi khat ‘Cess’ a lak tlingkhawm chauh pawh Rs vbc 25 chuang a ni tawh daih ang,” a ti.
MNF Sr Vice President chuan sorkarin chhiah tam tak a la chung hian ZPM sorkar hnuaia Sairang – Kawnpui inkar kawng chhia avangin truck driver leh oil tanker pawl hrang hrangin nawrh huaihawt hialin sorkar an kar thin a. A vil turin ZPM sorkar hian an minister/MLA-te duty chhawkin an intir zo hlim hlawl a. Thla khat bak daih lova a chhe leh em em nghal mai te hi mipuiah hmai phihfai tum nan mai mai hmangah puhin, tuna an fan velna Dampa bial kawng a chhe lutuk te hi ngaihsakin rawng an bawlsak mipui tan siam tha thuai tura a phut thu a sawi bawk.