Final boruak sang tak pal tlangin Pakistan lakah wicket ngain India a chak a, chawlhni zanah trophy tel lovin player-ten hlim takin Asia Cup champion an lawm.
Dubai-ah tournament chhunga a vawi thum nan ram inhal pahnih an intawng a, thawk hmasa Pakistan tan Sahibzada Farhan leh Fakhar Zaman an inkawp fuh hle a, wicket hloh lovin run 84 thleng an siam dun a, Farhan chuan 57 tlinin Zaman chuan 46 a hlap a, mahse, a tawp lamah an siam tha tawk lo a, over 19.1-ah wicket hloh vekin 146 an thawk chhuak a ni.
India-in chak turin 147 siam a mamawh lain a tir over thumah wicket thum a hloh hman a, Tilak Varma chuan team tanpuiin nghet takin a tawp thleng a ding tlang a, tun 69 siamin Shivam Dube chuan 33 a hlap a, Sanju Samson chuan 24 vaw chhuak bawkin title an humhim a, ball hnih a la awm tihin 150 an siam a, wicket nga an hloh a ni.
A vawi kua nan Asia Cup-ah India a champion a, tournament chhunga vawi sarih a khelhah chak vekin hetih chhungin tum thum Pakistan lakah a chak a, inchibai lo bawkin team pahnih player-te an inthen leh a ni.
Lawmman an sem laiin harsatna lian tak a awm a, a hmain India team-in Asian Cricket Council President Mohsin Naqvi-a kut atangin trophy an dawng dawn lo tih an sawi lawk tawh a, chuti chungin Pakistan sorkara interior minister leh Pakistan Cricket Board-a president ni bawk Naqvi hi trophy hlan tura ruat a ni tho a ni.
India player leh team staff-ten mi dang hnen atanga medal an awrh hnuah trophy an la duh ta lo a, Naqvi hian trophy hlan turin mi dang a ruat duh bik lo a, khelmual a chhuahsan hnuah a thlenna hotel-ah champion trophy hi a kawl zui zel avangin India team-in khelmualah trophy tel lovin champion an lawm a ni.
India rama Jammu and Kashmir state chhunga Pahalgam bulah Pakistan rama Muslim firfiakten April 22 khan khualzin 26 an that a, a tam zawk hi Hundu an ni. Hei hian cricket huang chhungah ram pahnih inkar an nghawng zui zel a, Board of Control for Cricket in India secretary Devajit Saikia chuan, ram dang laka indona chawk chhuaktute hnen atangin trophy an dawng duh lo tih a sawi a, chutih laia Pakistan cricket hotupain trophy a kal bopui daih hian India a tilawm lo a, November-a International Cricket Council inhmuh khawmnaah nasa takin dodalna an lantir dawn tih a sawi.