Aizawl: Khawruhlian NGO Coordination Committee-in September ni 30, 2025 hmaa an khaw luh leh chhuahna kawngpui chu a nihna tur ang taka siam a nih loh chuan an khaw paltlang kawngpui zawng zawng dan chah an tum chu an thulh.
Pathiannia Khawruhlian YMA Run-a PWD Minister Vanlalhlana, Chalfilh bialtu MLA Lalbiakzama, Speaker leh NGO Co-ordination Committee, Khawruhliante thukhawm chuan, kawng dan chah an lo tum tawh chu thulh an rel.
Thutkhawmah hian PWD Minister Vanlalhlana chuan hmun hrang hranga kawng chhiate sorkarin a ngaihven reng a, a zavaia siam that vek a harsa a, a hmatiamin chak takin hma an la zel a. Ruahtui tlak avangin hna tan theih a la ni rih lo va, ruah tui tlak zawh veleh hmun hrang hrangah hna tan nghal a ni dawn tih a sawi.
Khawruhlian khuain harsatna an tawh pawh sorkarin a hriatpui tih sawiin PWD Minister chuan, SLT company-ten kawng siam hna an thawk mek a, an hnathawh that leh that loh te pawh PWD ten uluk takin an vil reng a, harsatna a awm chuan department leh sorkara inhawng reng tih a sawi a. Khawtlangin hna chhunzawm rem an ti tlang a nih chuan kawng siam chu chhunzawm leh nghal a ni ang tih a puang.
NGO Coordination Committee pawhin kawng dan an tum chu an sut nghal a ni.