Ngopa Welfare Committee, Aizawl-in “Luah Loh Lung Di” tih Music Video an buatsaih chu nimin khan MJA General Headquarters President C. Lalrambuatsaiha’n a tlangzarh.
Aizawl Press Club-a a tlangzarhna inkhawmah hian C. Lalrambuatsaiha chuan, hmanlai hlaphuahtuten hlarua hlu tak tak hmanga hla an phuah thin chu hlu a tih thu a sawi a, tunlai hlaphuah thiamte pawhin entawn a, an hlaphuahah hlarua hmang tam turin ngaihtuahna seng nasa lehzual se a duh thu a sawi. C. Lalrambuatsaiha chuan, Darchhunga hla phuah “Luah Loh Lung Di” tih chu Mizo zinga hla lar ber pawl, mi zawng zawngin an ngainat rawn tih theih a ni a, tunhmaain Naupang zirlaibu-ah telh thin, tun hnua telh a ni ta lo chu pawi a tih thu sawiin, telh leh dan awm thei se a tih thu a sawi.
Music Video tlangzarhna inkhawm hi Ngopa Welfare Committee, Aizawl Chairman, R. Zonunsanga’n a kaihruai a. Ngopa Welfare Committee, Aizawl Adviser, Vanlalduhsaka sawi danin, “Luah Loh Lung Di” tih hla hi Ngopa tlangval Darchhunga’n kum 1926-a a phuah a ni a. He hla hi a ngaihzawng kum 1914-a thi Thangi tan-a a phuah niin, he hla phuahtu Darchhunga hi kum 1962 khan Thangi thlan awmna Tualbungah kum 72 mi niin a thi a ni. Vanlalduhsaka chuan, Darchhunga phuah-ah chuan he hla hi chang 2 leh a thunawn a ni a, tuna mi thenkhatin he hla an sak larah hian chang 4 thlengte a awm a, hei hi tun hnua midangin an phuah belh ni-a a lan thu a sawi.