Aizawl: Palak bialtu MLA K Hrahmo chuan Dampa mipui mai bakah Mizoram mipuiin mi lar thlan ringawt chu a fuh ber lo tih an hmu fiah tawh tih a sawi.
BJP Mizoram MLA K Hrahmo chuan Dampa bialtu MLA Lalrintluanga Sailo-in van kohna a chhan tak avangin by-election neih a lo ngai ta a. A hmun ruak hnawh khah hi thil har tak tur a ni tih sawiin, “Tunah chuan MNF hian Pu Lalrintluanga Sailo an nei ta lo va, candidate hran hlak a nih tawh dawn mai bakah SEDP sem a ni tawh dawn lo va, chu bakah MNF an tling dawn tawh lo tih mipuiin an hriat tawh avangin MNF-ah mipuiin beiseina an nei tawh lo a ni,” tiin BJP Mizoramin Thawhtannia an party pisa chhung inkhawmah a sawi.
Dampa mipui mai bakah Mizoram mipuiin mi lar thlan ringawt hi a fuh ber lo tih an hmu fiah tawh tih sawiin K Hrahmo chuan, “Ruling ZPM tan pawh tlin inbeisei ngawt chi a ni tawh lo va. Congress ho lah Mizoramah an hniam telh telh mai bawk si a, Dampa bial mipuite hian central ruling BJP candidate lam an hawi fur chuan BJP tan tlinna chance tha tak a ni,” a ti.
Dampa bial by-election neih tura BJP official candidate Lalhmingthanga chungchang sawiin K Hrahmo chuan, “Dampa bial hmangaihtu leh an hmasawnna duhtu a nih avangin Dampa bial hian central ruling pawimawhna an hriat a rinawm a, tun hunah hian Dampa mipuite’n min thlang tling a nih chuan kum 3 tha zet BJP MLA enchhinna hun a awm dawn a, in lo thlang tling a nih a, BJP MLA a lo thalo a nih chuan 2028-ah MLA in thlak leh mai dawn nia,” a ti bawk.