Aizawl: Health Minister Lalrinpuii leh Power Minister F Rodingliana te’n nimin khan Civil Hospital, Aizawl tan VIP line kawlphetha pek theih dan tur an enfiah a. Tun hnaia kawlphetha lama damdawi in-in harsatna an tawhte sutkian dan turte an sawiho nghal.
Nimina Civil Hospital, Aizawl an tlawhnaah minister pahnihte hi damdawi in hotute’n lo dawngsawngin, damdawi in hi Mizoram damdawi in zinga mipui pan nasat ber anih avang leh tunlai khawl changkang chi hrang hrang CT Scan, MRI-te bun anih bakah Dialysis Centre, Operation Theatre bakah ICU ah te kawlphetha mamawh reng anih thu te, Cath Lab peihfel tep tana kawlphetha chawllo a mamawh anih dante leh, tunhnaia damdawi in generator lian a chhiat avanga kawlphetha lama harsatna an tawh dan leh mipui damlote nasa taka a nghawng dan te an lo hrilhfiah a ni.
Minister pahnihte hian damdawi ina kawlphetha hmanna chi hrang hrang – CT Scan, MRI, Dialysis Centre leh ICU te bakah Operation Theatre te an tlawh a, he damdawi in tana VIP te tana kawlphetha line mamawh anih dante, line thar atanga Civil Hospital tana darkar 24 khaihlak lo a power pek dan tur ruahman nghal a. Hemi atana sum mamawh tur te pawh a rang thei ang bera sorkar dil an tum thu an sawi bawk.
Power Minister F Rodingliana chuan Civil Hospital, Aizawl chhunga high mast awm, hun rei tak chhung chhe tawh pawh a rang thei ang bera siam that dan kawng zawn anih tur thu a sawi.
Minister pahnihte hian PMJVK sum hmanga Civil Hospital, Aizawl Block A leh Block B sak dan tur tlangpui bakah, Trauma Centre a insuan lut tura hmalak ngai thenkhat an enfiah bawk.