Aizawl: MNF National Core Committee member Tawnluia chuan Forest Conservation Amendment Act 2023 chu an do zel dawn tih sawiin, an sorkar veleh he dan hi an hnuklet nghal dawn tih a sawi.
Nimina Mizo Hnam Run chhung inkhawmah Deputy chief minister hlui ni bawk Tawnluia chuan, “Pathian leh mipui zarah kan sorkar leh a nih chuan kan sorkar leh veleh FCAA 2023 sorkarin a adopt hi kan hnuklet nghal ang,” a ti.
FCAA chu Mizoram tan a tha lo va, an pawm thei lo tih sawiin Tawnluia chuan, “He dan hi MNF sorkar khan Assembly-ah resolution pass-in Mizorama hman a remti lo a, a hnawl tawh a. Lok Sabha Secretary General hnenah pawh August ni 28, 2023 khan hriattir nghal a ni a. Chuvangin, he dan hi Mizoramah hman a ni lo,” a ti a. “ZPM sorkar-in he dan Mizorama hman tura an pawm ta hi a pawi tak zet a. Remna thuthlung zahlohna leh palzutna a ni a, kan pawm thei lo a, kan do zel dawn,” a ti bawk.
Tawnluia chuan ZPM sorkar-in ram an hralh a, sorkar laipuiin an duhdan ang anga Mizoram hmang thei turin phalna a pe hi rem an ti thei lo tih sawiin, “Kawng hrang hrangin tunhnaiah nationalism-in beih a tawk mek a. Kan ram, kan hnam leh sakhua venghim zel turin hnam pasaltha leh martar-te hniakhnung i zui ang u. Mizo mipuite kan tanrual a ngai lehzual ta hle a ni,” a ti.