Aizawl: Pathianni zan dar 7:15 vel khan Sairang – Kolkata Express relin Mualkhang station bul leiverh-ah mi pakhat a chil hlum.
Thu dawn danin, relin a chil hlum hi Zonunzira (51) Tripura-a Naisingpara lam mi a ni a, amah hi Bru niin, Khamrang ram chhunga Oil Palm leh Rubber huan enkawla inhlawh a ni.
Zonunzira hian rel kawng kan a tum laiin, rel hi lo tlan thutin a chil ta ni-a hriat a ni a, a hmunah a thi nghal a ni.
Vanduaina thlen thu hi hriat a nih ve leh Kawnpui Police-in a hmun an pan nghal a, thil thlen dan enfiah-a tih tur pawimawh hrang hrang an tihfel hnuah a ruang hi lain, Pathianni zan khan Kawnpui Police Station-ah kawl a ni a, Kawnpui CHC ah doctor an awm remchan loh avangin Kolasib District Hospital-a Posmortem tura buatsaih a ni a. Nimin khan post mortem a nih hnuah a chhungte kuta a ruang hi hlan nghal a ni.
Kawnpui Police-te chuan he vanduaina thleng chungchangah hian thih dan pangngai lova thi (Unnatural Death) hmangin thubuai ziah luh a ni tih an sawi. Railway Protection Force pawhin vanduaina thlenna hmun hi an pan nghal a, thuneitu sang zawk lamah thil awm dan an thlen nghal a ni.