PWD Minister Vanlalhlana chuan October ni 30, 2025 atangin Aizawl khawpui kawng siamthat hna an thawk tan dawn tih a sawi a. Aizawl leh Lunglei inkar kawng pawh hma an la zui nghal dawn tih a sawi.
Thawhtannia ZPM party-in an pisa-a chhung inkhawmah PWD Minister Vanlalhlana chuan, Aizawl khawpui kawng chu hun rei tak siam that a ni tawh lo chu tha takin an siam dawn tih a sawi a. Tuna Bawngkawn kawng tha tak an hmuh ang hian siam vek an tum tih a sawi.
October ni 30, 2025-ah hna an tan dawn tih sawiin Vanlalhlana chuan, “Hot Plant hmun hnih PTC Lungverh leh Lengpuiah din a ni a, kawngpui pawimawh laia hman tur phei chu Silchar lung tha lak luh kan tum. Bituminous concrete a ni a ni dawn a, Aizawl leh Lunglei inkar kawng pawh kan ngai pawimawh a, kan thawk chhumzawm ang,” a ti.
PWD Minister chuan Mizoramin kawngpui a neih chu a vaiin km 6,610 a nih thu sawiin, heng kawng zawng zawng hi a enkawltu tur pawh a inthen sa vek tih sawiin, tun dinhmuna an lu tihaitu ber chu Vairengte atanga Sairang inkar kawng a ni a. Hei hi NHIDCL-in a enkawl tih a sawi.
NHIDCL enkawl ni mah se, Kolasib leh Kawnpui inkar leh, Khamrang leh Sairang inkar kawngte Mizoram sorkarin contractor-te ruaia hna a thawh mek lai a ni a, NHIDCL-in heng kawng siam hna hi la mah se a laklawh lai kawng siam hna an kalpui reng tho tih a sawiin, “Laih zawh a nih hnuah NHIDCL-in an enkawl zui ta mai si lo va, enkawltu nei lo ang maiin a awm hman ta a. Fur pui a lo thleng a, kawng a chhe chho zel a, harsatna kan tawk ta a ni,” a ti.
Harsatna mipuiin an tawh takah chuan sorkar an che lo thei lo tih sawiin Vanlalhlana chuan, “Nikumah pawh harsatna lian tak kan paltlang thei a, NHIDCL kuta awm a nih miau avangin a siam that hna pawh an thawh tur a ni. Chuti chung chuan Mizoram sorkar chuan Finance Department-ah a siamna tur Rs vbc 9 kan dil a, kan dawng thei mai ta lo va, department sum ringawt hmang chuan he kawngpui hi enkawl sen a ni lo. Mahse, sorkarin a ngai pawimawh em em a,” tiin, tun thleng hian an ngaihsakin an la buaipui reng tih a sawi.
Heng zawng zawngah hian mawhphurtu chu an ni a; mahse, mawh an phurh dan erawh a zavai chuan a ni lo tih sawiin PWD Minister chuan, “Kawng tha siam turin khaw tha kan mamawh a, hei hi kan harsatna leh buaina lian ber niin, thal hun kan thleng chho ang a, kan kawng te pawh a tha chho tawh turah ka ngai,” a ti bawk.