Chief Minister Lalduhoma’n College of Veterinary Sciences & Animal Husbandry, Central Agriculture University (Imphal), Selesih din cham kum 27-na lawmna hmanpuiin, college campus chhunga sak thei leh thlai thianghlim dan endikna Pesticide Residue Analysis Laboratory a hawng.
Chief Minister chuan Selesih Vety College chu Mizoram mai ni lovin India hmarchhak state dangte tana zirna in tangkai a nih thu a sawi a. Mizoram mipui tam ber hi agriculture kaihhnawiha eizawng an ni a, ran vulh phei chu an uar a. Ran vulh leh enkawl lama thiamna nei mamawhna a san avangin uar taka mipui zirtirna kalpui a ngai a. Chung thil pahnih an mamawh em em te thawhsaktu tangkai tak chu he college hi a ni tiin, “Mipui eizawnna leh he college hi a inzawm tlat avangin mipuite pawhin he college leh Thenzawl Horticulture College hi kan ngaihven a ni,” a ti.
Chief minister chuan Pesticide Residue Analysis Laboratory chu All India Networks Project on Pesticide Residue hnathawh nan chauh ni lovin lo neitute tan leh an thlai lakluhte endikna atan a tangkai thei dawn a. Vantlang hriselna tha tawk an neih theihna atana hmanraw pawimawh tih sawiin, “Zirlai leh zirbingna neite tan a tangkai hle bawk ang. Mizoram tan hmasawnna chhinchhiahtlak a ni,” a ti.
Foundation Day lawmna hi college auditorium-ah buatsaih a ni. Inkhawmah hian khualzahawm Horticulture Minister C Lalsawivunga, Agriculture Minister PC Vanlalruata, Dr. Anupam Mishra, Vice Chancellor, Central Agriculture University, Imphal, Dr. Vandana Tripathy, Network Coordination, All India Networks Project on Pesticide Residue ten thu an sawi bawk.