Mi fate hi chuan tar nih an tum lo a, upat vanga han zuai deuh hlek nih tum lovin, tunlai mila in update ve zel a tum a nih ber hi maw.
Hmanni lawkah IG a account titawpin, kir leh tumna lam hawi engmah a neih thu a sawi lo a, a thil post hrang hrangte chu mipui mit fukna a ni thup a nih kha. A inchhir vang nge, inlak maksak deuh a tum vang pawh tih hriat lohin a instagram a titawp a, tunah erawh a rawn let leh ta.
Kum 43 mi Spears hian kartawp khan a IG account chu rawn tinung leh thutin, ‘Kumin chu thil tam tak a thleng a, mak tak tak pawh a ni. Theih tawpa thaa nun ka tum a, thlirna tarmit vuah dik chhoh pawh ka tum viau,’ a rawn ti leh hlawl mai.
‘Circus’ singer hian a IG-a a rawn kir lehna hi a account a tihtawp hnu ni nganaah chiah a ni a, a pasal hlui Kevin Federline chungchang a sawi hrep hnu lawk a nih avangin, zawhna hrang hrang a dawng hnem zui hle nia sawi a ni.