Aizawl: Home Minister K Sapdangan ZPM sorkarin inthlan hmain kalphung thar an zuar a, inthlan an hmachhawn leh hunah vote zawn nan kalphung thar an hman tawh dawn loh thu a sawi.
Thawhtannia ZPM-in an pisa-a chhung inkhawm an neihah thu sawiin UD&PA minister ni bawk chuan, Aizawl khawpui leh district hrang hranga harsatna lian tak an tawh thin, leimin chhiat rupna laka ven beihpui thlak nana tuiluankawr siam nan UD&PA-in sorkar laipui atangin SASCI hnuaiah Rs. vbc 103 ruahmanin hma an lak mek thu a sawi a. Aizawl khawpuiah Rs. nuai 6,100 ruahmanin hmalak mek a nih thu leh district dangah Rs. nuai 4,200 hmangin thawh a nih thu a sawi.
Home Minister K Sapdanga chuan venghimtu police an lak danah tun hma khan dik tawk lo tam tak awm chu, tunah hian dik leh tha zawka department kalpui a, police lak dan pawh dik taka kalpui mek zel a ni a. Police an lak dan a dik tawk avangin tunah chuan India ram pumah Mizoram chief minister chuan fak a hlawh phah der tawh a. Chu mai ni lovin home department hnuaia departmental exam an buatsaih pawh a dik tawk a, a tling zo loten dik taka kalpui a nihzia an hre zawk tih a sawi.
Ruihhlo luhna kalkawnga khaw 20 chuangin ruihhlo do beihpui thlakpui turin an thlang a, tunah hian rim takin department mite nen an thawk mek tih sawiin home minister chuan, “He beihpui thlakna hian nasa takin ruihhlo a tikiam a, tunah phei chuan kan police-ten Delhi tlang thlengin he lama inhnamhnawihte zuk umin an man hial a ni,” a ti a. Aizawl khawpui chhungah pawh September 1 atang khan Central YMA-te nen thapui an thawh mek a, Krismas hunpui lo thleng tur pawh him leh nuam takin kan hmang thei turah an ngaih thu a sawi a. Sorkarin theihtawpin kuhva smuggling a do zel dawn tih sawiin Mizoram chhunga kuhva chingtute lamah sorkar a tang zel dawn tih a sawi bawk.
K Sapdanga chuan ZPM sorkar hian inthlan hma khan kalphung thar an zuar a, inthlan an hmachhawn leh hunah chuan vote zawn nan kalphung thar an hmang tawh dawn lo tih sawiin, “Kan inzawrhna ang ngei khan hna kan thawk em tih hi kan inzawrhna tur a ni. Mizoram mipuite hian term khat chauh ni lo, term tam tak he ram rawngbawl hna thawk tur hian min duh ngei dawn a ni,” a ti.