Aizawl: Sports & Youth Services Minister Lalnghinglova Hmar chuan Pallavi Jain Govil, Secretary (Youth Affairs), Government of India chu Shashtri Bhawan, New Delhi-ah Thawhtanni khan kawmin Youth Affairs, GOI hnuaia Mizorama hmalak dan turte a sawipui.
Lalnghinglova Hmar chuan Ministry of Youth Affairs & Sports kalpui Mera Yuva Bharat (NYKS ni thin) hnuaia Mizorama indaih lohna nasa tak a awm thu Secretary chu a hrilh a. Mizorama district 11 zinga pariatah MYB-in district office a nei a, tun dinhmunah District Youth Officer (DYO) pali chauh an awm thu leh accountant leh Multi-Tasking Staff (MTS) phei chu pakhat ve ve chauh an awm tih a sawi.
Union Youth Affairs Secretary chuan UPSC kaltlangin DYO 190 an la mek tih sawiin DYO awm lohna district 420-ah an sem tur thu leh Mizoram pawh an pek tur thu a lo hrilh a. Accountant leh MTS te pawh agency kaltlanga an lak tur thu leh, tun atanga rei lote-ah Mizoramah pawh an post tur thu a sawi.
Lalnghinglova Hmar chuan Luangmual, Aizawl-a Youth Hostel chu a ram neitu nih inchuhna a awm mek a, hetihlaiin Mizoramah Sairang thleng rel a luh tawh avanga khualzin an pun bawk avangin Youth Hostel thar mamawhna a sang tih a sawi a, ram tur chu sorkarin a neih theih tur thu a sawi bawk.
Youth Affairs Secretary chuan Mizoram sorkarin lehkha pawimawhte a thehluh hunah hma an lak thuai tur thu leh, Mizoram case chu ngaih pawimawha an neih tur thu Minister a lo hrilh a ni.