Aizawl: New Delhi-a cham mek, Tourism Minister Lalnghinglova Hmar-in Thawhtanni khan Dr. VK Paul, Member, NITI Aayog chu New Delhi-a NITI Aayog Headquarters-ah a kawm a, Mizoram tourism hmasawnna tur chungchang ngaihtuahin hmalakho dan tur a sawipui.
Tourism minister chuan tun hnaiah Mizoram tlawhtu an pung nasa tih sawiin Sairang thleng rel a luh hnuah phei chuan Aizawla hotel leh homestay pawh khualzinin an luah khat thin hle tih a sawi a. “Mizoramin pho chhuah tlak hmun mawi leh nuam tak tak kan nei a, heng hmunte hmanga tourist hip lut tur chuan a khawtual miten kan hlut a, kan tlawh hmasak a ngai. Hemi kawngah tun hnaiah nasa takin hma kan sawn a, a lawmawm hle a ni,” a ti.
Mizoram tourism hmasawn nana NITI Aayog leh Mizoram sorkar hmalakna tur sawiho zingah Mizoram Tourism Conclave buatsaih a tel a. Stakeholder tam zawk an tel theihna tur leh, Mizoramin a hlawkpui theih tura ruahmanna siam nise tih a ni. Hemi chungchang bika hmalatu tur ‘Task Force’ dina a rang lama a hun tihchian theih nise tiin rel a ni a. New Delhi-a ‘Mizo Day’ hman chungchang sawiho bawk.
NITI Aayog leh Mizoram sorkar tangkawp chuan November 24, 2025-ah Mizoram sawhthing tharchhuah chungchanga inrawnkhawmna, ‘Stakeholder Consultation on Ginger Produce for Mizoram’ tih chu New Delhi-ah neih a ni dawn a. He hun hi Mizoram Chief Minister Lalduhoma’n a telpui dawn a, sorkar official bakah industry, zirna in leh organisation tam thei ang sawm an nih tur thu meeting-ah tar lan a ni a. Hemi zulzuia sector dang – a bikin tourism – a programme siam chungchang ngaihtuah ho a ni bawk.
An inkawmnaah hian Mizoram sorkar atangin Vanlaldina Fanai, Commissioner & Secretary, Tourism Department; Alexander V. Chongthu, Resident Commissioner, Mizoram House, New Delhi; R. Lalrodingi, Director, Tourism Department leh H. Lalramenga, PS to Minister ten tourism minister hi an tawiawm a. Vanlaldina Fanai-in Powerpoint presentation hmangin Mizoram tourism dinhmun tlangpui a sawi.