Chakai nufa kal inzirtirah chuan a note chu sir zawngin kal chhaw chhaw suh, hma lam panin kal ta che a ti a. A note chuan i kal danin alawm ka kal a ti tih naupang thawnthuah kan hmu thin. A hruaitu kal dan hi a hnungzuitu kal dan a ni thin a. Midang kaldan dika kaihruai turin engtinnge kei hi ka kal tih hi khawvel inkaihhruaina pawimawh ber a ni.
Tunhnaiah kan sawrkar home deparment hnuaia traffic police te chuan Mizoram lirthei neituten dan bawhchhia a, sawrkara chhiah pe mumal lova lirthei kawl an tam lutuk chu tih dik theih nan December ni khat atang khan dan bawhchhetute chu ngaihthiamna awm hauh lova, man fuh apiang hremna pek pawp pawp hun ‘no tollerance’ week an puang a. Dan mumal lova lirthei kawltute pawh an tawmim nasa hle in Aizawl khawlai traffic chevel pawh thawl sawta sawi a ni. Amaherawh chu NGO pakhat Center for Environment and Social Justice chuan hetih chhung hian sawrkar motor kawl lai leh mi pawimawh ho document te a fel em tih an lo chhui ve thung a. An thil hmuhchhuah chu sawrkar tan mualphothlak tak a lo ni reng mai.
Kan sawrkar motor enkawltu ten dan an bawhchhiat nasatzia bakah sawrkar milian tak tak dan bawhchhetu an nihzia an pholang chiang hle a. Sawrkar tan mimal motor han check ngam zia an nih loh chu a chiang hle.
Dan hi tupawhin zawm vek kan ni a. Chutih laia mipui zirtirtu tur zawk kan sawrkar milian ten dan an bawhchhiat miau chuan sawrkar hian mipui hi dan zawm turin nawr ngam zia zang a ni lo. Chakai nufa kaldan inzirtir ang chauh kan ni a, mipuite hi min kaihruaitu kan sawrkarte kal dan entawna kal zel kan ni.
Eiruk kan sawichhia a, ram tan a pawizia kan sawi laia a sawituin a eiruk miau chuan eiruk chu mipui leh hnathawktute tan kalsan theih a ni ngai lovang. Sawrkar retheihzia sawia inrenchem pawimawh thu sawi renga kan ram hruaitu ten motor man to tak tak sawrkar pawisaa an lei pawp pawp chhung chuan an hnuaia hnathawktute chuan motor man to neih ve dan an zawng lo thei lova, kan chief minister in contract hnathawh chungchanga restricted tender a sawichhiat thiam em em, mipui tiretheitu, sawrkar sum bawm rawkna ti hiala a sawi lai a, amah vekin a duhsak zawngte restricted tender hmanga hna a pek vak vak chhung chuan mipui chuan restricted tender hmanga hna hmuh dan an zawng ve ngei ang.
Lui chu a hnar a fim chuan a mawng lam pawh a fim tia tehkhin thu a sawi thinte chu Mizote thinlung ata nawhreh a ni zui a. A hnar chawknu tu chu amah anih tak avangin mipui pawh luitui nu but maiah inbual turin kan tei lut hut hut ta mai a ni ber rih e. Hotu ber min kaihhruaina hi retheihna lamtluang pan a nih chhung chuan khua a var mai lovang a, mi tam takin khuareiah pawh kan kalphung hi an ten hluah hluah ngei ang.