Mi 25 thihna, Goa-a nightclub kang ta neitu pahnih chu thil thlen hnu lawk, Inrinni zan khan Thailand panin an chhuak nghal tih police-in an sawi a. An la zawng zui mek zel.
An laka first information report (FIR) ziah luh a nih hnu lawkah police team-in rinhlelh pahnih, Gaurav leh Saurabh Luthra zawngin Delhi an pan nghal a. An inah an lo awm lo va, police hian hriattirna an hnutchhiat nghe nghe.
Police hian Pathianni tlai khan Bureau of Immigration hnenah lo thlithlai tura ngenna an pe nghal a. An chetna thlir zui nghal a ni a, thuneitute hian ram luh leh chhuah theihna hrang hrang, thlawhna tumhmun leh lawngte an vil nghal vek a ni.
Mumbai thlawhna tumhmuna Bureau of Immigration chuan rinhlelh pahnih hi Pathianni zing dar 05:30 khan Thailand-a Phuket pan turin an thlawk chhuak tih an hmu ta a, hei hi a hma zan chiaha kangmei a chhuah hnu lawk tihna a ni a. Unau hnihte hi Goa hmar lama Birch by Romeo Lane nightclub a kan lai khan Delhi-ah an la awm a ni.
IndiGo flight 6E-1073 hmangin Thailand an pan a. Tun laiin IndiGo hi thlawk hleithei lo mah se an buaina hian ram pawna an thlawh chhuahtirte a nghawng ve lo va, India chhungah chauh an buai a ni.
Man duh mi pahnihte hian police chhui theihna chu an pumpelh tih police chuan an sawi.
Goa Police chuan Central Bureau of Investigation (CBI) hnuaia Interpol division an be tawh a, an man duhte hi a rang thei ang bera dap chhuahpui turin an ngen a ni.
Anni unau bakah mi dang pakhat, Bharat Kohli-a erawh Delhi-ah man niin thu zawh fiah turin Goa-ah hruai a ni tawh.
Nightclub hawn a nih theih nana phalna pek kaihhnawiha sorkar department hrang hrang hotute pawh thu zawh fiah tawh leh zawh fiah tur an la awm nual a, permit leh licence an pek danah dan palzut a awm em tih hriat tum a ni a. Police chuan tunah rih chuan a chhui hna ngawrh taka kalpui niin an thil hmuh azirin kal zel dan tur a chiang dawn tih an sawi.
A hmain Goa thuneitute chuan Fisheries Director Shamila Monteiro-i chu a hna atangin an lo chawlh lailawktir tawh a. Ani hi Goa State Pollution Control Board-a member secretary a nih laiin club din phalna hi pek a ni a, pek an nih danah rinhlelh a kai mek a ni.