Aizawl: Lai Autonomous District Council (LADC) inthlan neih zawh takah party mala sorkarna siam thei an awm lo va, MNF candidate tling hnem berin bial pariatah hnehna an chang.
LADC inthlana vote tlate chu Thawhlehni zing dar 8 atang khan Govt. Lawngtlai College-a Counting Hall-ah chhiar a ni a. Chawhnu dar 1:30-ah zawh fel a ni a. Vote chhiar nan hian counting hall pathum awmin, Counting Hall 1 (table 5), Counting Hall 2 (table 8) leh Counting Hall 3 (table 9)-ah te chhiar a ni.
LADC-a MDC bial 25-a vote tlate chhiar zawh takah MNF chu bial pariat-ah hnehna an chang a, INC chu bial pasarihah an chak a, ZPM chu bial parukah chakin BJP-in bial pahnihah hnehna an chang a, independent tlinna bial pahnih a awm bawk.
Donny Lalruatsanga (Returning Officer), David Lalrinawma (Returning Officer) leh H. Zonunmawia (Returning Officer) te chuan MDC thlan thar te hnenah hian ‘Certificate of Election’ an hlan nghal a ni.
LADC inthlan result puan takah MNF chuan thuchhuah siamin, Lairam mipuite chungah lawmthu sawiin Lairam mipui duhthlannaa thlanchhuah zawng zawngte an lawmpui thu an sawi a. Inthlan result chuan sorkar dinglai ZPM mipuiin an rin tawk tawh lohzia a tarlang chiang hle tih sawiin, MNF MLA neih lohna bial pahniha seat pariat zet laa MNF-in seat la tam ber an ni thei hi a lawmawm an tih thu an sawi a. LADC-ah MNF kaihhruai sorkar nghet leh chak tak a din ngei an beisei thu an sawi.
ZPM pawhin thuchhuah siamin LADC inthlanpui neih zawh taka thlan tlin tak MDC-te an lawmpui thu leh MDC tha tak ni tur leh Lai district hmasawnna tura theih tawp chhuaha thawk turin duhsakna an hlan a. Chutih rualin, ZPM party candidate leh party dang candidate tling zo ve ta lote an tawrhpui tak zet tih an sawi.
ZPM chuan tun tumah seat la tam ber ni mah se, kum 2020 LADC inthlanpui atanga an party hmasawnna chu lawmawm an tih thu an sawi a. ZPM candidate vote-tu zawng zawngte leh party tana theihtawp chhuahtu zawng zawngte chungah lawmthu an sawi.
Thlan tlinte:
1- Sangau East – BN. Thangpuia (BJP)
2-Sangau South – JB. Vanhoy ( MNF)
3-Sangau West – Lalchhuangliana (BJP)
4-Cheural – T. Lalchhuanvawra (ZPM)
5-Lungtian – Sanghuliana Mualchin ( MNF)
6-Lunhpher South – C. Lalmuanthanga (INC)
7-Vawmbuk – T. Zakunga (ZPM)
8-Bualpui ‘Ng’ West – Lalzahawma Chinzah (MNF)
9-Bualpui ‘Ng’ East – Dr. K. Lalchhuanpuia ( ZPM)
10-Lawngtlai Bazar – Lalropuia Chinzah ( MNF)
11-Lawngtlai Vengpui – C. Ngunlianchunga (INC)
12-Lawngtlai Chandmary – C. Lalsawmzuala (MNF)
13-Lawngtlai Council Veng – Lallura Chinzah ( ZPM)
14-Lawngtlai College Veng – C. Hrangthianga (MNF)
15-Lawngtlai-III – MC. Lalbiakliana (MNF)
16-Lawngtlai A.O.C – L.R. Dingliana Chinzah (ZPM)
17-Paithar – V. Zirsanga (IND)
18-Diltlang ‘S’ – Hc. Lalthawmliana (MNF)
19-Chawngte ‘P’ – H.C. Lalengkima ( INC)
20-Sakeilui – Sukriti Chakma (INC)
21-M.Kawnpui – Premo Kanti ( INC)
22-Bungtlang ‘S’ – K. Lalramzauva (ZPM)
23-Sekulh – J. Lalrawngbawla ( INC)
24-Tuithumhnar – H. Vanlaltanpuia (INC)
25-Vathuampui – C. Lalneihkhuma (IND)