Aizawl: Art & Culture Minister C Lalsawivunga’n Mizo history zirchiana kawngah Mizoram sorkar a inhawn thu leh, kawng hrang hrangin hmalak mek a nih thu a sawi.
History & Ethnography Department, Mizoram University-in ‘Beyond Borders and Texts: Reframing the History and Polity of Highlanders in the Eastern Himalayan Borderlands’ tih thupui hmanga international seminar a buatsaih chu nimin khan khuallian niin Minister C Lalsawivunga’n a hawng.
Hawnna inkhawmah minister hian Mizo history chu mi dangin an lo ziahsak thin a, hetiangah hian a nihna dik tak an hre fuh lo fo a, dik tawk loa an ziah a awm tih sawiin Mizote ngeiin Mizo history an zir chian a, an ziah ve tul a tih thu a sawi.
Mizoram sorkar chuan Mizo history zir chian tul a tih avangin Art & Culture department hnuaia Tribal Research Institute bul tumin, Mizo tobul chhui tura hmalak a nih thu sawiin C Lalsawivunga chuan, zirna peng hrang hranga mi thiamten Mizo history chhuinaah hian tel tir an ni, a ti.
Seminar hawnnaah hian Prof. Robin-a, Prof David C. Williams, Indiana University, North East India historian lar Prof Sajal Nag-te’n thu an sawi bakah, Mizoram University-a finance officer Prof Vanlalchhawna pawh khualzahawm niin a tel a ni.
Seminar hian ni thum a awh a, mi thiam hrangin thu sawiin paper an present dawn a ni.