Aizawl: Chief Minister Lalduhoma kaihhruaiin Thawhlehni khan Mizoram State Project Monitoring Committee (MSPMC) vawi 7 nan an thukhawm. CM Conference Hall-ah thutkhawmah kumin chhunga project an endik 40-te report an thlirho.
Chief Minister chuan, project thenkhat chu pumpelh theih loh harsatna eng emaw avanga hna kalpui theih loh a awm lo thei lo va. Chuvang chuan, an project endik tur chanchin kimchang an hriat lawk theih nan endik tura an thlante hi rawn hriattir hmasa se an hnathawh a kal chak zawka a rin thu a sawi a. Nikuma an hnathawh report bu chu a tha hle a, MLA zawng zawngten an neih ve ngei a thaa a hriat thu a sawi bawk.
Project Monitoring Committee hian nikum chhungin project 47 an endik a, kumin April thla atanga nimin thlengin project 40 an endik a. Project an endik tawh zawng zawng hi 87 a ni.
Nimina thutkhawmah hian kumina an endik bikte report an thlirho a. Kumina an endik project 40 te hi Social sector-ah project 13, Education, Health leh Agriculture sector-ah te project panga theuh, Communication (Road & Bridges) ah leh Industrial sector-ah project pali ve ve, Vety leh Public Health sector-ah project pakhat ve ve leh Energy sector-ah project pahnihte an ni.
General Body Meeting chuan Project thar thawh tur DPR-ah Life Cycle Costing chipchiar tak telh thin ni se, tia rawtna chu an sawi ho hnuah, project pakhatah pilot anga kalpui chhin tha an ti.
Project thar thawh turah DPR siam dawnin, a theih chen chen chu project-in a hrut tel tur hote nena inhriattirna leh inrawnkhawmna neih zel ni se, an tih bakah, Project Executing Department ten project hna tan dawnah Nodal Department, Contractor leh Implementing Agency te chu Project Management Plan Quality Control chungchang inhrilhfiahna hun nei ngei thin se, an ti bawk.