McLaren boss Zak Brown chuan Formula 1 champion Lando Norris-a’n an inel laia champion thei ve tho, Max Verstappen kha a hlau lo tih a sawi.
Formula 1 season khar nana Pathiannia Abu Dhabi-a an intlansiak dawn khan McLaren driver pahnih, Norris leh Oscar Piastri bakah Red Bull driver Verstappen te kha champion thei an ni a. Intlansiak zawhah British driver a champion.
Hemi hma chiaha Las Vegas-a an intlansiakah Norris leh Piastri te chu dan bawhchhiat vangin an hrem a, an disqualify takah chuan champion lai Verstappen-a’n hmahruaitu, Norris chu a hnaih phah sawt.
Round ruk a la awm tihin October 5 khan McLaren chuan constructors’ championship title an la der tawh a, kum 2008-a Lewis Hamilton a champion hnua a vawi khatna atan drivers’ championship title an lak leh hmasak ber a ni thung.
Brown chuan, “Verstappen hi driver tha a ni a, F1 driver awm tawh zingah pawh a ropui berte zinga mi a ni hial ang,” a ti.
“Max leh Red Bull kan elpui thei hi a lawmawm hle a, chutiang kara driver champion thei dinhmuna ding pahnih kan nei phei hi chu lawmawm tak a ni a. Hetiang hi kan duhthusam ngei chu a ni,” a ti bawk.
A sawi zelnaah, “Max hi vawi li ngawt world champion lo ni thei tawh a ni a, tun season-ah pawh vawi sarih a chak ber a, hei vang hian ngaihnep chi a ni lo,” a ti.
Brown chuan, “Norris hi driver tha deuh mai a ni a, champion ngei pawh a tum a. Theihtawp a chhuah a. Mi tumruh tak a ni a, zam mai mai lo a nih bawk avangin Verstappen pawh kha a hlau lo a ni,” a ti bawk.