MPCC Spokesperson Lalbiakzama chuan December 5, 2025-a Saipum-a HSA inkhawmpui neih zawh takah Chief Minister Lalduhoma chu thu belhchian dawl lo sawiah puhin thumuhnu kai tho zawng leh Mizote inkara rilru intihnatsak thei zawnga belhchian dawl lem lo thusawi chu sim atan tha a tih thu a sawi.
Thawhlehnia Aizawl Press Club-a thu thar thehdarhtute a kawmnaah Lalbiakzama chuan kum 1991/92 HPC-te movement vanglai khan tihluihna nen Saiphaiah Saipum khua khawm tum an ni a tih chu thu belhchian dawl lo a ni tih a sawi a. “Tihluihna ni lovin, a duh tan duhthlan theihna siam a ni a, sorkar khan rangva leh pawisa thlengin pek a inhuam a, Saipum mai ni lovin Sakawrdai lamah pawh he rawtna hi siam a ni. Anmahni duhthlannain chhungkaw eng emaw zat chu he rawtna ang hian an pemkhawm nia hriat a ni,” a ti.
MPCC spokesperson chuan, “HPC area-ah curfew puan thin khan chhun lam a huam ngai lo va, zan inkhawm pawh kha hmun tam takah chuan phalsak an ni,” tiin, tuna chief minister-in kha’ng hun laia a kal dawnah curfew hlihsak tura Lt. Governor a ngen thu a sawi chu mak a tih thu a sawi a. Kum 1987-ah Mizoram chu state a nih thu leh hemi hnu hian Lt. Governor a nei tawh lo tih a sawi.
CM-in invauna lehkha thehdarh chungchang a sawi chu Lalbiakzama chuan, “MLA inthlan 1993 (?) khan lehkha invaunate thehdarh chu a ni ngei mai a; mahse, a thehdarhtute chhui chian khan MNF block hruaitute leh an unit-te tih a ni tih pawh an chhui chhuak a ni. Block president hi khatih lai khan kohhran upa a ni nghe nghe a. ‘Upa tihah chuan a mawi lo mange’ kan tih khum hial reng a nih kha. Heng thil thleng report-te hi tihchhiat a la nih loh chuan kan CID (SB)-ten an file hluiah an la kawl tha ang,” a ti.
HPC-ten zalenna suam anga chief minister-in a sawi pawh a hriat sual a nih a rin thu sawiin, “Autonomous district council an ngen (demand) a ni zawk,” a ti.
Chief minister-in HPC leh Mizoram sorkar inremnaah inrawlh anga a insawi chungchangah Lalbiakzama chuan HPC ‘D’ leh Mizoram sorkar inbiaknaah Mizoram aiawh team leader-ah ruat a nih thu a sawi a. An inbiak chhung zawng khan tuna chief minister hian vawi khat mah inrawlhna a neih a hriat loh thu leh amah leh a party hian engmah an nawrpui awm pawh a hriat loh thu a sawi a. An inbiakna tum khat chu HPC ‘D’ palaiten Lalmuanpuia Punte chu an spokesperson anga a tel ve phalsak turin a dil thu leh an remtihsak thu a sawi.
MPCC spokesperson chuan Saipum khuaa CM-in HPC ‘D’ nen inremna zawngin an inbe mek anga a sawi chu a barakhaih tih sawiin, demand an neih a hriat loh bakah Mizoram chhungah buaina an thlen lo tih a sawi a. “Hetianga CM-in thu tak hla taka thil a kalpui a nih chuan tuna Lalhmingthang Sanate leh a hote mi 10 rual velte remna siampui an tum a nih chuan rehabilitation sum beiseiin an rawn insawi tam belh khawp ang,” a ti bawk.