Aizawl: Urban Development & Poverty Alleviation Department (UD&PA) hmalaknaa Rs nuai 500 senga din, Aizawl Zonuam venga ‘Multi-purpose Community Centre’ leh Rs nuai 145 senga sak, Aizawl khawpuia mipui veivakte tana chawlh hahdamna tur, Zodin Square, Vana Pa Hall bula ‘Aizawl Dawh-Rem’ chu Thawhlehni khan UD&PA Minister K. Sapdanga’n a hawng.
MCC Conference Hall, Zonuam vengah Multi-purpose Community Centre (MCC) hawnna inkhawmah K Sapdanga chuan Multipurpose Community Centre din a nih theih nana ram petu School Education Department leh YMA-te chungah lawm thu a sawi a, he centre din a nih theih nana sorkar kaltaten hma an lak tawhnate fakin khawtlang hruaitute inpekna leh inlungrualnate chu lawmawm a tih thu a sawi a, Multipurpose centre a nih ang ngeia kawng hrang hranga ram leh hnam tana chhenfakawm, inlungrualna leh inpumkhatna thlentu ni tura a duhsak thu a sawi.
UD&PA Director Jacob Lalawmpuia’n a tar lan danin Multipurpose Community Centre hi state sorkar sum, state fund atanga sak niin Rs nuai 500 senga sak a ni a, a satu hi ZT Powers, Chanmari niin, October, 2021 khan sa tanin, September, 2025-ah sak zawh a ni a. Chhawng thum awmin chhawng tinte hi 462.20 sq m-a zau theuh an ni a; kawngpui an (ground floor) hi parking tura ruahman niin car 20 leh two-wheeler 20 vel dah theihna a ni a; chhawng khatnaah Govt. Primary School awmin chhawng hnihnaah library, meeting room, kitchen/pantry, office leh conference hall mi 200 lenna awmin chhawng thumnaah badminton hall leh inthlakna pindan a awm a. Carpet tha chi, Lining Company kutchhuak, 4.50mm-a chhaha thuam a ni bawk.
UD&PA minister hian Multipurpose Community Centre a hawn hnu hian Aizawl khawpuia mipuite chawlh hahdamna tur, ‘Aizawl Dawh-Rem’, Zodin Square-a mi chu, a hming ‘Dawhrem’ a nih ang ngeia inrem tak leh inlungrual taka mipuiin chawlh hahdam nan leh inkawmhlim nana an hman turin a hawng a.
Aizawl Dawh-Rem hi state sorkar sum, Rs nuai 145 senga din a ni a, contractor hi LHM Infra, Khatla niin May, 2023 khan sak tan a ni a, October, 2025-ah sak zawh a ni.
Aizawl Dawh-Remah hian in hnuai kawngpui anah two-wheeler parking, self help group show room leh store-room te a awm bakah, in chhawng laita hi sanitation site office tur atan hawn thar a ni nghal bawk a; a enkawl zui tur hian Mizoram Florists Association-te nen inremna siam niin anni hian kum khat atan Rs nuai khatin an cheiin an enkawl dawn a ni.