Aizawl: Ram chhunga sorkar damdawi in tha bik tehna, National Quality Assurance Standards (NQAS)-ah HWC-Primary Health Centre pathum — South Lungpher PHC, Bungtlang South PHC leh Tipa PHC te an tling thar.
Heti hian Mizoram chhunga HWC-PHC 57 target awm zinga 43-in National-level NQAS certificate an nei tawh a ni.
Tun dinhmunah sorkar damdawi in 57-ten NQAS national-level certificate nei mekin, sorkar damdawi in 16 leh HWC Sub-Centre 31 ten national-level assessment an dil leh mek a ni.
Dr. Lily Chhakchhuak, Mission Director, NHM chuan India rama damdawi in tha tehna NQAS national-level endiknaa tling thar South Lungpher PHC, Bungtlang South PHC, leh Tipa PHC te hian a tehnaah 86.10%, 87.86% leh 90.90% te an hmuh thu sawiin, he dinhmun thleng thei tura thawktu zawng zawng te, khawtlanga an thawhpui RKS/JAS Chairman leh member zawng zawng te, an bial chhunga ASHA zawng zawngte thawhrimna chu fakin, lawmthu a sawi.
NQAS certified damdawi inte hi endikna chhawng thum paltlang an ni a, a tawp bera endikna an hmachhawn hi National External Assessment a ni a, state pawn atangin Assessor (endiktu) an lo kal thin a ni. Hetah hian a tehnaa 70% an hmuh tlin chuan certified an ni chauh thin.