Supply Minister B Lalchhanzova chuan hunpui lo thleng turah eirawngbawlna gas harsatna a awm lo tura an ngaih thu a sawi a. March, 2026-ah chuan Aizawl khawpui chhungah LPG home delivery kalpui vek tum a nih thu a sawi bawk.
Nilainia a pisa-ah thu thar thehdarhtute kawmin Supply Minister B Lalchhanzova chuan hunpui lo thleng turah eirawngbawlna gas harsatna a awm lo turah an ngai tih sawiin, chumi tur chuan sorkarin theihtawp a chhuah niin a sawi a. Vairengte leh Sairang inkar kawng pawhin ziaawm lam a pan zel takah chuan Indian Oil Corporation Limited (IOCL) lam pawhin Mizoram a gas tih thlen kawngah harsatna an nei tawh lo tih an puang niin an sawi bawk.
Supply minister hian hunpui lo thleng tur inbuatsaihna atan IOCL lam chuan December 13, 2025 hma ngeiin LPG booking backlog/pending clear vek turin a hriattir tawh tih sawiin, “Distributor zawng zawngin hemi hnuah hi chuan booking nghah chhung hi ni hnih aia rei an rial tur a ni lo. Distributor hma la thalo te chungah IOCL lamin an chungah action a la zel dawn a ni. A tul angin FCS&CA pawhin enzuiin hma a la ang,” a ti.
Hunpui lo thleng turah hian kohhran zawng zawngin Krismas ruai buatsaih nan sumdawngte hman tur bika siam gas cylinder lian (commercial cylinder) hmang vek tura ngenin, chu chu IOCL lam duhdan pawh a nih thu a sawi bawk.
Minister sawi danin tun dinhmunah district headquarter hrang hrang, Aizawl AMC area, Serchhip town, Hnahthial town, Khawzawl town leh Mamit town-ah te LPG home delivery zaa 100 kalpui a ni tawh a. March, 2026 atang chuan Aizawl khawpui chhung zawng zawng bakah district headquarter dangate zaa 100 kalpui ve theih turin hma lak an tum a ni a. September, 2026-ah Notified Town zawng zawngah zaa 100 home delivery kalpui tum a ni bawk.
Distributor-ten gas an deliver reng rengin customer/consumer hmuh lai ngeiin an buk hmasa tur a ni tih sawiin B Lalchhanzova chuan, “Delivery boy-ten a bukna an keng zel tur a ni a. Home delivery-a gas pek chhuah turte hi an godown atangin dan angin check sa vekin an load chhuak leh ang,” a ti bawk.