Newcastle United CEO David Hopkinson chuan an club chu nasa taka chawi kan tumin hma a lakpui mek a, tun atanga kum nga lo awm leh tur chhungin khawvela club ropui berte zinga a tel tawh tur thu a sawi.
Kumin kum tir lamah khan Hopkinson chuan Madison Square Garden Sports atangin Newcastle United a zawm a. An club hmasawnna tur kawng a dap kual nasa hle a, theihtawp chhuahin tan pawh a la a. Hetianga hma a lak hnuah hian tuna an dinhmun aia sang daihah an awm theih a ring nghet tlat a ni.
An club-in hma an sawn chak dan chu rocket thlawk nen a tehkhin a, an zinkawng chu kawng awlsam a ni dawn hauh lo tih sawiin, an thil tum ber chu sang taka awm theih a nih thu a sawi chhuak.
Hopkinson chuan kum 2030 chu an thil tum an hlen chhuah kum a nih tur thu sawiin, he mi kumah hi chuan Newcastle United chu khawvela club lian zual zinga sawi tel a nih tawh tur thu a sawi.
Chutiang dinhmun thleng thei tur erawh chuan inpekna te, tanrualna te a pawimawh thu a sawi nasa hle a. An club chuan an thil tum hlen thei turin an tum berah an chian a ngai hle tih sawiin, chu mi tihlawhtling tur chuan anmahni ringhleltute chu ngaihsak duh miah loh a pawimawh thu a sawi bawk.
Hopkinson-a hian hlawhtlinna chu nomawi a tam thei ang ber lak te, chak hnem te a nih thu sawiin, manager Eddie Howe kaihhruaina hnuaiah Premier League nomawi la thei team tha tak din tura theihtawp an chhuah tur thu a sawi a. Kum tin inelna sang bera tel thei zel tura tan an lak chhoh tur thu pawh a sawi bawk a ni.
An duhthusam anga an awm theih nan an sum dinhmun pawhin hma a sawn ve zel tih sawiin, an chet that belh ang bawka an sum pawh a pun belh ve zel thu a sawi.
Newcastle chu khawvela club lian ber ber, Real Madrid leh Barcelona te nen inhnaih tial tial tura a duh thu a sawi a, Real Madrid global head of partnerships a lo nih tawhna atanga a tawnhriat hmang tangkaiin, khawvel hmun hrang hranga hriat an hlawh a pawimawhzia a sawi nasa hle.
Kum 2021 khan Newcastle United sum che vel chu £ maktaduai 140 atangin £ maktaduai 330-ah a chho dawrh a, tunah hian an sum che vel chu £ maktaduai 500 tlintir an tum mek a. Hetiang dinhmun an hawlh chhoh theih chuan an club chu club lian zinga sawi tel an ni thei tawh dawn a ni.
An khelmual, St. James’ Park chu an la hmang zui zel rih dawn a, nakinah chuan an khelmual an tizau a nih loh leh a thar an sak pawh a la tul dawn a. Leazes Park-ah mi 65,000 thut theihna sa thar dawn se an senso tur chu £ tluklehdingawn 1.5 vel a nih a ngai dawn a. Hopkinson chuan hetiang hian hma an la dawn a nih pawhin kum eng emaw zat an duh dawn tih a sawi a ni.
An club training neihna hmun tihchangtlun dan kawng pawh an dap mek a, heti lai hmun Benton chu tunah hian rating 7/10 chauh pek a ni rih a, Newcastle United chuan 10/10 ni thei tura buatsaih an tum a ni.