Aizawl: Zarkawt kohhran bial ina Synod Inkhawmpui vawi 102-na neih mekah, Nilaini khan rorel ni 1-na neih niin, Pastor Bial thar pasarih hawn tura pawm a ni.
December 10, 2025, chawhma dar 9:30-ah inkhawmpui tan a ni a. Palai lawmna, Synod pawn palai lawmna leh inkhawmpui chibai bukna neih a ni. He mi zawh hian Moderator tang lai Rev. R.C. Lalnghakliana chuan Rev. John Raldosanga hnenah Moderator mawhphurhna a hlan.
Nomination thu ngaihthlak a ni a, kum 2026 Synod Inkhawmpui programme leh puipa turte pawm a ni.
Kum 2026, 2027 leh 2028 inkhawmpui thlengtu tur chu inkhawmpui hmasa lamah tihfel a lo ni tawh a. (2026 – Chanmari Pastor Bialin Chanmari Kohhran biak inah, 2027 – Ramhlun North Pastor Bialin Ramhlun North Kohhran biak inah, 2028 – Republic Veng Pastor Bialin College Veng Kohhran biak inah). Kum 2029 Synod Inkhawmpui chu Electric Veng Pastor bialin Electric Veng Kohhran biak inah an thleng ang.
Kum 2026-a Pastoral Ministry thupui atan ‘Thlarau leh tih tak zeta Pathian biak’ (Johana 4:24) pawm a ni a, Pro. Pastor pawh mi 15 lak tura pawm a ni bawk.
Pastor Bial thar pasarih hawn tura pawm a ni a. Chu’ngte chu Pastoral hnuaiah Salem Veng bial, Falkland bial, Champhai Zotlang bial leh Dolchhora bial, Synod Mission Board hnuaiah Koreng bial, Ranchi bial, Masihi Sangati Serchhip Pastor bialte an ni. Hetih lai hian Presbytery hawn thar tur a awm lo.
Nepal Mission Field chhunga Tarahara Bial station chu Salakpurah sawn niin, bial hming pawh Salakpur Pastor Bial tia thlak a ni a. Odisha Mission Field chhunga Adava Pastor bial thuthmun chu Duringuda-ah sawn a ni a, Duringuda Pastor bial tia hming thlak a ni bawk. Bangalore North Mizo Presbyterian Kohhran chu bial thuthmun atan pawm a ni.
Minister, Pastor leh Pro. Pastor-te awmna tura Pastoral-in ruahmanna a siamte chu inkhawmpui hian a pawm a. Sipai Pastor-a lut an awm theih nan Synod-in a buaipuitu tur ruat tha tih a ni a, SEC hmalak turin dah a ni.