- K. Hmingthankaia
Addict ho leh City bus chungchang hi chanchinbuah ka ziak hnem tawh hle. Mahse, kan sawrkar chak lem lo tak hian a ngaihna a hre lo ni berin ka hria.
City bus-te stand-a an ding rei lutuk hi passenger tan a pawi bakah, nilenga stand an awh khat tlat reng hian mipui nunphung a tichepa, a tibuaia, traffic jam a tih tam phah thute, min rawn tlawhtu khualzin laka a zahthlak thute, nikhat thil thua ban mai theih driver leh conductor-ten nikhat thil thua hlep ruk tur an duham vang mai mai a nih thute ka lo sawi tawh thin a.
He thilah hian Aizawl City Bus Owner Association-te, STA, Transport Director leh Traffic SP te pawh ka sawipui tawh thin a, annin tha tak leh beiseiawm taka min chhang chung pawhin awmzia pakhat mah a la awm thei chuang lo a nih hi. Sawrkar hmasa atang leh tun sawrkarah phei chuan a ruhlang, na tak takin vawi tam ka lo ziak tawh a ni.
Ka sawi tam tawh em avangin vawikhat chu sawrkarin min rawn tihder, min rawn prank thu leh, keiin tak tak emaw lo tiin chanchinbu lama ZPM sawrkar chunga lawmthu sawina ka lo ziah hman thawt thawt thute, chu thupek, city bus-te passenger chhuk leh lawn chhung bak stand-a din phal loh tih chu nikhat chiah, September ni 1.2025 chauh an zawm chung pawha Aizawl a tih nawm sawt thute, mahse, nikhat bak city bus-ten an zawm leh duh loh avanga ZPM sawrkar chunga lawmthu ka lo sawi thawt thawt chu ka zah leh thute nen lam ka ziak leh tawh a ni. Mahse vawiin thlenga a ngai renga an la khawsak avang hian he sawrkar chungah hi chuan ka beidawng ta deuh a ni e.
Aizawla addict ho, rukru rual ni bawkho huangtau leh zaktheilo lutuk ninawm thute, inven reng a ngaih thute, khualehtui thate tan a timawm zawk thute, zing atanga khawlaia hmuh tur tam lutuk leh an inchiu mawlh mawlh lai leh an mu phengphungte leh, an kun ngawih ngawihte, an bungbu deuh ketkutte hmuh tur tam lutukte pawh hi ka sawi zing ta hle a. Tin, khualzin laka a zahthlak thute, khualzinte an la bumin, an thil an la ruksak mai a hlauhawm thute, anni vang hian kan la mualpho dawn chauh thu leh, kan chanchin hi a video nen lam a chhe zawnga a la darh nasat a hlauhawm thute ka lo ziak ve fo tawh a ni.
Tin, hengho hi siam that tak tak theih an nih loh avanga khungkhawm bova enkawl zui mai a tha ka tih thute, heng rukru rualho chhuah zalentute pawh khan khungkhawm leh tawh mai tur te leh, TBCC leh OKM te hi be tha lehin, hengho khungkhawm nana hmanga, a sawrkar ang leh khawtlang anga chawmpui mai a that zawk ka rin thute ka lo sawi tawh a ni.
Mahse, khitiang thil pahnih, kan ram leh hnam, Mizote nun tihreawmtu leh timualphotu, khualzinte laka zahthlak bawk si, nitin kan khawpui ber Aizawla a thleng reng leh awlsam taka nitin kan hmuh reng hi sawrkar hian tihngaihna a hre thlawt lova, nitin a ngaitein a la thleng reng a nih si hi.
Khi thil pahnih, city bus khawsazia leh addict hnawksakho tidanglam tur hian sawrkar tan thil harsa engmah a awm lova, pawisa sen belh leh mithiam rawih emaw, contractor rawih emaw pawh a ngai hek lo. Thupek khauh tak siam leh a force neihsate hmanga enzui kha a ni mai a. Mahse, chu chu sawrkar hian a ti thei ngang si lo a nih hi.
Chuvang chu a ni ngei ang hei, sawrkar aia chak zawk leh thil ti thei zawk Central YMA chu a lo lang leh ta rap mai e. Central YMA kumpuan hawnna, ni 10.12. 2025 zana Vanapa hall-a neiah CYMA president Pu R. Lalngheta chuan, fuihna leh thu tha tak tak a sawi bakah, khawlaia ruihhlo ti thin hawna nei lo ho chu hemi zan la la atanga an vai tur thu leh, TBCC lama dah an nih tur thute, a dahtu branch lam pawhin ngaihven zui tura a duh thute a sawi ta riap mai le. A va lawmawm em..
Central YMA chuan chawplehchilhin a ti nghal tak tak ang tih ka rin avangin, ni 11.12. 2025 zinga he thu, LPS Chibai Mizorama ka ngaihthlak rual rualin, ‘Central YMA chuan a ti leh ta nge nge e’ tih ngatin ka rawn ziak nghal a nih hi. Ka thuziak pawh a phel deuh phung maithei. Mahse, ka lawm em avanga ziak nghal chuk chuk ka nih avangin min lo hrethiam dawn nia.
Kan ram tana tha lo leh mawi lo, nitin nun tihreawmtu nitin Aizawl khawpuia thleng reng, awlsam taka hmuh reng theih leh awlsam taka tihreh theih reng, mahse, nitin la thleng reng si ka vei em em pahnih zinga pakhat, addict hnawksakho chunga Central YMA- in hma a rawn la ta hi ka lawm em em a. Min tiphurin beiseina pawh nasa tak min neihtir leh ta a ni.
Chutih rualin, ka vei em em pakhat dang, City bus-te awm tha duh lo pawh hi Central YMA hian khawngaih takin hma han la ve nghal se tiin ka ngen tak meuh meuh a ni e.
YMA tang fan fan la vul zel ang che aw. KA LAWM E.