Aizawl: Tuichang Nghakuai Chiah Runpui, 2025 chu Inrinni khan kharna hun hman niin, Fisheries depeartment Minister Lalthansanga’n a hmanpui.
Kharna inkhawmah Minister Lalthansanga chuan, Tuichang luia YMA in sangha an humhalh thin Mizoram hmun hrang hranga nghakuai chiah tute tana intihsiakna leh intihthawvenna atan hlawhtling taka hun hma a ni chu lawmawm a tih thu a sawi a. Tuichang lui chu Serchhip district paltlangtu khualzinte tan pawh luidung nungcha humhalh pawimawhzia hriattirna remchang tak nia a hriat thu leh zin kawng tinuamtu leh hmun pawimawh takah a chang ta nia a hriat thu a sawi.
Lalthansanga chuan Keitum branch YMA te thawhrimna leh luidung nungcha humhalh tura thahnem an ngaihna te hriain, Fisheries Department hian RKVY leh PMMSY hnuai atangte pawhin an tha tihchakna turin sum leh pai an lo pe ve tawh thin a, a phu pawh an phu a. Lui dung nungcha humhalhna leh a pawimawhzia tihhmuhtu pawimawh tak an ni, a ti a. Mizote hian an ram lui dung sanghate hi humhalhna kawngah hma an sawn nasa tawh hle a, chutih rualin tan an lak lehzualna tur thil pawimawh tam tak a la awm a, neitu rilru pu a, he lui sanghate dam khawchhuahna tur leh Mizo mipuiten lui sangha thianghlim taka an man theihna tura humhalh kawnga hma la zel turin duhsakna a hlan.