December 1 atanga bo, Marina Lalchhanchhuahi (26), Tanhril chu Inrinni khan MZU field thlangah thia hmuh a ni a. Pathianni khan vui a ni.
Thu dawn danin Marina-i ruang hi Inrinni tlai thim hma deuh dar 5 vel khan ram vakin an hmu a ni.
Marina-i thih chhan hi thu chiang hriat la ni lo mah se a bialpa chu police-in thu zawhfiah atan an la nia thu dawn a ni.
Marina-i hi a bona a rei deuh tawh avangin a ruang hi a chhe nasa tawh a, hmuh a nih thu hi police hriattir nghal a ni a, thil tul an buaipui bakah forensic mi thiamten an endik bawk.
Thil tul tihfel a nih hnuah a ruang hi kuanga dah a ni a. An chenna in tlawhpui a nih hnuah Inrinni zan khan Civil Hospital, Aizawl mitthi dahnaah dah a ni a, Pathianni khan postmortem a ni.
Marina-i hi December 1 chawhma dar 11 velah Ramrikawna kal turin a chhuak nia sawi a ni a. Tlai dar 5 velah Tanhril Vengthar-ah auto rickshaw-a a chuang lai hmuh a ni leh a, hemi hnu hian a chin hriat zui a ni ta lo a ni.