MP NGAWI RENG vs MP BENGCHHENG

• Dr. C. Lalrampana

Mizoram atangin Lok sabha MP leh Rajya Sabha MP 9 ve ve kan nei tawh a, chungte chu tutenge i han thlir hmasa lawk teh ang.

Lok Sabha MPs:

1. Richard Vanlalhmangaiha: ZPM, MP thlan tlin, vote 2,08,552 a hmu, vote za zela 42.45% a chang;
2. C. Lalrosanga: MNF, MP thlan tlin kum 2019, vote 224286 a hmu, vote za zela 45.12% a chang;
3. C. L. Ruala: INC, MP thlan tlin kum 2009 leh 2014, vote 210485 a hmu, vote za zela 49% a chang (kum 2014);
4. Vanlalzawma: MNF, MP thlan tlin kum 2004 leh 1999, vote 182864 a hmu, vote za zela 52% a chang (kum 2004);
5. Dr. H. L Lallungmuana: Independent, MP thlan tlin kum 1998;
6. Dr. C. Silvera: INC, MP thlan tlin kum 1989, 1991 leh 1996;
7. R. Rothuama: Independent, MP thlan tlin kum 1977 leh 1980;
8. Pu Sangliana: Mizo Union, MP thlan tlin kum 1972; 9. Pu Lalduhawma: INC, MP thlan tlin kum 1984-te an ni.

Rajya Sabha MPs:

1. Lalbuaia : INC 26.06.1972 – 16.07.1978;
2. Lalsawia : INC-17.07.1978 – 04.07.1984;
3. Dr. C. Silver: INC-17.07.1984 – 28.11.1989;
4. Hiphei : INC-05.07.1990 – 30.06.1996 & 01.07.1996 – 16.07.2002;
5. Lalhmingliana : MNF-19/07/2002 – 18/07/2008 & 19/07/2008 -18/07/2014;
6. Ronald Sapa Tlau: INC-2014-2920-te leh tuna MP ni mek K. Vanlalvena MNF-te hi an ni.

Heng LS & RS MP 18 kan neihte hi an hun lai theuh thlirin an fel êm êm vek a, thiamna lamah lah hming bula Dr. dah thei R. Rothuama tiamin pathum lai kan nei a. Dr. C. Silvera hian Minister of State for Health & Family Welfare leh Minister of State for Industry a lo chelh tawh a ni. Minister of State for Health & Family Welfare: Kum 1994 February 17 atanga kum 1999 September 15 thleng. Minister of State for Industry: Kum 1995 khan Minister of State for Industry a lo ni tawh bawk a, a chhuanawm hle. Hetih lai hian kan hranghluite kha Parliament thutkhawmah NE state leh Mizoram mipuite tan an bengchheng tam lem lo tlang hle a niang, Mipui pawhin “MP NGAWI RENG” tih tawngkau chheh duhawm tehchiam lo hmanga kan MP zahawm tak takte kan sawizui fona chhan chu ni! Mahse, kan MP lo ni tawhte hi an fakawmin an chhuanawm hle. An hun lai azir zelin thil awmdan a danglam thin. An theihtawp chhuahnate kan selzui chiam tur a ni lo. Dam chhunga an dinhmun ang dai pha ve lo tur deuh vek kan ni ngei ang.

Hetih rual hian thiamna lama chhuan tur nei tlem ber nia lang tuna RS MP K. Vanlalvena hian Achievement langsar tak tak a nei, Global Leaders Award: a dawng tawh a, hei hi North East India, Myanmar leh Bangladesh-a tribal-te tana a thawh that vang a ni. Tribal-te hamthatna atan theihtawp a chhuah thin a, India danpui-a tribal list chungchang pawh rorelnaah a thlen tawh. Mizo National Identity humhalh a tul thu a sawi uar a, Mizo hnam nihna hi India ram chhungah chauh ni lo, ram dangah pawh hnam angin an chhiar a ni, a ti. SAGY Model Village: Pangkhua chu SAGY Model Village atana thlan niin, bul tanna hun a hmang a ni. Income Tax chungchang auchhuahpuiin Income Tax Office, Guwahati chu Mizo tribal-te chungchangah dan kalha hma an lak loh nan a ngen. MP K. Vanlalvena chuan Income Tax Office, Guwahati chu Mizo tribals chungchangah dan kalh taka hma an lak thin chu pawi a tih thu a sawi. Rajya Sabha-a thu sawiin, Section 10(26) of the Income Tax Act hnuaiah Mizo tribal-te chu income tax phut an nih loh thu a tarlang. Chuvangin, Mizo mipuite chu income tax pek ngai lo kan nih avangin Income Tax Certificate leh Tribal Certificate-te chu entir mahse, Income Tax official-te’n an tibuai fo chu pawi a tih thu a sawi. Rajya Sabha Chairman hnenah Principal Chief Commissioner of Income Tax, Guwahati hnenah hriattirna pe turin a ngen a. Mizo tribals chungchangah dan zawm lohna a awm loh nan Income Tax Office, Guwahati chu hma la turin a ngen.

Assam leh Mizoram ramri buai chungchanga a thusawi avangin Assam police an lawm lem lo. Assam police-te chu Mizoram ramri-ah an lut niin a sawi a, “An vaia thah an nih loh avanga lawm tur an nih thu leh, an lo lutleh a nih chuan an vaia thah an ni ang,” tiin huai takin a sawi a nih kha! Assam leh Mizoram ramri buai avangin mi 6 an thi a, mi 45 an hliam a ni. Assam police chuan Mizoram MP K. Vanlalvena thusawi chu Assam police-te tan a hlauhawm an tih thu an sawi nghe nghe.

Hei bakah hian, K. Vanlalvena chuan Myanmar rama Chinland Council-te chu India Union-a tel turin a sawm tawh bawk. Myanmar ram buai avangin Chinland Council-te chu India Union-a tel theih dan tur ngaihtuahpui a tum thu a sawi bawk.

RS MP K. Vanlalvena hi MP ngawi reng chu a ni lo tawp mai. A awmna political party chu thudang ni se, a hma zawnah huaisen takin Mizoram leh hnam tan Rajya Sabha-ah hiaisen takin a bengchheng ngamin a tawng tam a; a tawng tam dan erawh awmze nei, ram leh hnam tana tangkai zawng vek a ni. hetihlai hian Mizoram CM 6 zinga tawng tam ber leh dang nâl ber nia sawi chu Pu Lalduhawma leh Pu Zoramthangate an ni. Pu Lalduhawma hi a tawng tam danah Election Commission of India (ECI) pawhin Model Code of Conduct (MCC) bawhchhiaa zilh hauh a lo tawk tawh hial a. Amah hi Zoram People’s Movement (ZPM) party leader leh Mizoram CM niin December 8, 2023 khan CM atan lak luh a ni. Kan CM 6-te chu:

Pu Ch. Chhunga (1972-1977): Mizo Union Party. Brig. T. Sailo l(1978-1984): Mizoram People’s Conference Party Pu Laldenga (1986-1988): Mizo National Front.
Pu Lal Thanhawla (1984-1986,1989-1998, 2008-2018): Indian National Congress;
Pu Zoramthanga (1998-2008, 2018-2023): Mizo National Front;
Pu Lalduhawma (2023-present): Zoram People’s Movement-te an ni.

Bawrhsaiabe ei kher ngai lova Former CM Zoramthanga & Lalduhawmate dangnãl dan hi an awhawm hle a, a nihna takah chuan saptawng pawh an nâl dun hle a, an chhuanawm dun hle. Mahse, an dang nãl dan leh bengchhen dan hi RS MP K. Vena dang nâl dan leh bengchhen dan ang hian ram leh hnam tana hlawk zawng leh tangkai zawngin bengchhengin dang nâl se a va’n tihzia dawn tehlul êm! Mahse, ECI zilh hau ngai khawp leh mipui nuihza siam nana an tang fo ta mai nia lang hi chu an nihna zahawm tak nen hian a inmil lo hle niin a lang. Chuvangin, kan ram hruaitu zahawm tak pahnihte hi an pianthar (born anew) a ngai tih an inhriat a hun takzet ta.

LS MP ni lai Richard Vanlalhmangaiha pawh a hmaa mite ai chuan rorelna inah a bengchheng ve zauh zauh ta a, alawmawm hle. Ani phei hi chu saptawng leh pakka Hindi thiam tel a ni a, LS MP K. Vena nen hian Kan ram leh hnam tan awmze neiin bengchheng chhunzawm dun zel se “MP ngawi reng” nih ai chuan Zoram leh Zohnahthlakte hian kan tangkaipui lehzual ngei ang.