Lai Autonomous District Council (LADC) inthlan a zo a, vote chhiar zawh atanga hapta khat dawn a liam leh hnuah pawh sorkarna siam tur an la awm lo. Sorkar intawm siam tura indawr tawnna awm mekah ZPM party hruaituten sorkarna an siamnaah tel ve turin BJP sawm mah se Congress telnaah chuan intah luh loh an duh zawk a, sawmna an hnar rih.
The Zozam Times zawhna chhangin BJP MLA K. Hrahmo chuan LADC-a sorkarna siam tura indawr tawnna awm mekah ZPM party hruaituten Congress nena sorkar siam dun an tumnaah BJP MDC-te tel ve tura an sawm thu a sawi a. “ZPM headquarters hruaitu lawk zinga miin telephone-in min rawn bia a, keini MDC pahnihin kan thlawp chuan MDC 15 an nih tur thute a rawn sawi a, an zinga tel ve turin min rawn sawm,” a ti.
Sorkarnaa tel tura sawmna an dawn chu lawmawm ti viau mah se, Congress party telnaah erawh tel ve an duh lo tih a sawi thung a, amah betu ZPM hruaitu lawk hnenah pawh Congress telnaah chuan va inrawlh ve rem an tih loh thua a lo chhan thu leh sawmna an dawn chu an hnar tak rih thu K. Hrahmo chuan a sawi.
LADC inthlanpui neih zawh takah khan MDC bial 25 awmah BJP party-in bial 10-ah candidate an nei a, MDC bial pahnih – Sangau East leh Sangau West bialah an chak a. BJP MLA chuan MDC pahnih nei angin lang mah se independent MDC pahnihte chu an lamtang an ni a, an kalna apianga kal tur an nih thu a sawi bawk.
LADC inthlan neih zawh hlim khan MNF leh Congress party chu sorkarna siam dun tura ngaih ni mah se Congress hian thawhhona an lo neih tawh chu an tihtawp thu an puang a, tunah hian Congress leh ZPM-in sorkarna intawm an siam dawn hnai niin thawm a awm mek thung.
MNF Vice President Lalchhandama Ralte chuan Congress-in thawhdunna an lo neih tawh an tihtawp leh tak siah chuan opposition-a awm pawi an tih loh thu te, party headquarters hruaitute pawhin eptu lama awm tur angin Lawngtlai an chhuahsan tih The Zozam Times a hrilh a. Hetihlai hian thawm hrang hrang a awm belh zel tih sawiin, MNF MDC Legislature Party chu a tul dan anga hma la tura an kuta an dah tak rih thu a sawi.
Tun hnaiah Congress party President Lal Thanzara’n ZPM nen sorkar siam tura an inbuatsaih mek thu an party office-ah a sawi laiin ZPM headquarters-a hruaitu lawk, elected OB zinga mi chuan Congress nen thawk dun tura thutlukna an neih lo thuin The Zozam Times zawhna a chhang thung a; vote chhiar zawh hnuah MNF leh Congress lamin ZPM chu sorkarna siampuiah an dawr ve ve tih te, anni lam erawh chuan tu party mah an dawr lo tih a sawi.
A sawi zel danin ZPM MDC-te leh Congress lam hi an lo indawr a, hei hi ZPM party thuneitu sang erawhin an hriatpui lo va, LADC-a sorkar siam tur chungchanga party dang thawhpui turin eng thutlukna mah kan la nei lo a ti a; chutihrual chuan party hruaitu zingah palai hna thawk tur erawh an inruat tih leh tunah rih chuan thumum an la nei lo tih a sawi bawk.
Tar lan tawh thin angin LADC inthlanpui neih zawh takah khan party mala sorkarna siam thei an awm lo a, MNF bial pariat lain, MDC nei tam ber an ni a; Congress-in bial pasarih, ZPM-in bial paruk, BJP-in bial pahnih, independent candidate pahnih MDC atan thlan tlin an awm bawk a ni.