Aizawl: Cod Nerc NGO-in kum 2016 atanga dinhmun harsate a thawhpuina project – In dam tlang em? (How Are You Project) chhungkua te tan Thawhtanni khan Emerald Hotel, Treasury Sq-ah Advance Christmas an hmang a. He project dintu B. Lalchhanzova, I&PR Minister-in a hmanpui.
He intawhkhawmnaah hian Project HAY-in an thawhpui chhungkua atanga kum 15 hnuai lam leh kum 70 chung lam te, Santa Claus Letter (Christmas present atana an duhzawng ziah) te chu semna hun neih a ni a, he Santa Claus letter hi mi tlawmngai leh thilphal te donation an dawn atanga leisak an ni.
B. Lalchhanzova chuan HAY chhungkuate tan Project How Are You chu kawng hmang nei taka mi harsate dinhmun tinep a, mahni ke a ding thei tur leh mihring an nih anga an zahawm hum thei tura kaihhruaina a nih thu sawiin, midang tana malsawmna nih duh luanchhuah dan hre mailo te tan thawhpui atan an inhawn reng thu leh Education Minister Dr Vanlalthlana te chhungkua pawhin Project HAY an thawhpui mek thu a sawi bawk.
Tun dinhmunah hian AMC area chhungah HAY project hian chhungkaw 250 chuang enkawl mek niin, retheihna avanga tawrhna tihnep hi a tum ber a ni a, tanpui ngaite tanpui dan dik kalpui a ni bawk.
Project HAY kaltlang hian zirlai sponsorship kalpui te, eizawnna tur kawng dap sak te, counselling pek te, loan puk thei tura tanpui te, legal aid pek te leh an mamawh dan mil zelin thawhhona hi kalpui thin a ni.