Aizawl: C. Lalramenga, kum 49 mi, Farkawn chhim veng, (Theirekawn) thihna chungchangah thil fel tawk lo a awm nia hriain a nupui, Lalremruati’n Dungtlang Police Station-ah FIR a thehlut kal zelah Farkawn VDP member mi paruk Champhai District Jail-ah dah luh an ni.
Thudawn danin C Lalramenga hi Inrinni khan Myanmar-ah a kal a, hei hi Farkawn VDP chuan chhui zuiin Inrinni zan dar 11 vel khan thu zawh fiah turin Farkawn Community Hall-ah an ko a. A kut atang hian zu fun 35 an mansak a. Thu an zawh fiahnaah hian a thiante an inpuan mai laiin C Lalramenga hian a zu dah thuhrukna a sawi mai duh lo niin VDP hian police hmaah an sawi.
VDP-ten thu an zawhfiah hnu, zanlai dar 12 velah VDP hian lirthei hmangin an inah an thlah a. Pathianni zing dar 5 vel khan C Lalramenga hi a thi a. A nupui chuan a pasal taksaah kutthlakna hnuhma tam tak a awm avangin a pasal thih danah hian thil fel tawk lo a awm nia hriain Dungtlang Police Station-ah FIR a thehlut a ni.
Dungtlang Police-te chuan he thihna thleng chungchangah hian Farkawn VDP member mi 10-te chu thu zawh fiah turin an la a. Thu an zawh fiah hnuah an zinga mi parukte chu Thawhtanni khan Champhai District Court-ah hruai niin lung inah khung nghal an ni.
Pathianni khan C Lalramenga ruang hi police hmaah, Farkawn damdawi inah postmortem niin, hemi ni vekah vui a ni.