Khawvelin a hriat lar zaithiam tak takte pawh dawhsanah an che tha reng bik lo. Tun hnaia che sual langsar ber chu Bad Bunny hi a ni ngei ang.
Tun chawlhkar tawp kalta khan zaithiam Bad Bunny, a hming tak Benito Antonio Martinez Ocasio hian Mexico City-ah show a nei a. A hla lar — Efecto — saa dawhsana a lam laiin chesualin, a tlu palh hlauh mai a. Hun eng emaw chen chu a insawh ve deuh avangin a thu nghe nghe.
Mahse, a chesual hnua a thut ve zuaih hnuah, fans lam chuan a zai lai mek tihtawp ngai lo turin an lo pui thuai a, a din chhuah leh hma chu a hla chu an lo sa dual dual a. A zai lai chu khaihlak awm lo vin a rawn din chhuah leh hnuah, che sual awm lo ang takin a zai chhunzawm leh nghal a ni.
Tití Me Preguntó — singer hi kum thara Super Bowl LX Halftime Show-ah a zai dawn a. A zai tur thu hi tihchian a nih hnuah sawisel a hlawh viau a nih kha.