International Tennis Integrity Agency (ITIA) chuan match-fixing vangin French tennis player Quentin Folliot chu inkhel thei lo turin kum 20 chhung an hrem tih an puang a, pawisa pawh $70,000 zet chawi tura tih a ni.
ITIA sawi danin Folliot hian Tennis Anti-Corruption Program (TACP) dan vawi 27 a bawhchhe tawh a. Dik lo takin pawisa pawh $44,000 chuang zet a la lut tawh nia sawiin, hetianga a sum lak luh tawh hi pe kir leh vek turin an ti bawk niin an sawi.
Folliot hi an hrem tan nghal a, May, 2044 thleng an hrem dawn a. May, 2024-a thubuai an siam tan atang khan hrem anga kaltir a ni dawn a ni.
Inkhel thei lo tura ITIA-in an hrem chhung hian ITIA huaihawt emaw, ram pum huap inelna buatsaih a nih reng rengin Folliot hi a tel ve thei lo ang a, player engin emaw, coach angin emaw a inhnamhnawih a rem dawn lo a. Hei mai hi a ni lo a, hetiang tournament hrim hrimah hian a kal phalsak a ni dawn lo bawk a ni.
An chhuinaah ITIA chuan kum 26 mi, Folliot chu match-fixing lama inhnamhnawih player eng emaw zat tihhmuhtu bulpui a ni tih an finfiah a. Folliot chu hetiang lama thiam loh chantir parukna niin a hmain Jaimee Floyd-Angele, Paul Valsecchi, Luc Fomba, Lucas Bouquet leh Enzo Rimoli te pawh match-fixing vang hian thiam loh an lo chantir tawh bawk a ni.
Kum 2022-a World No. 488 Folliot hi kum 2022 leh 2024 inkarah khan tennis inkhel vawi 11-ah dan 30 bawhchhiaa puh a ni a, hei hi amah hi chuan a pha nasa hle a. Dan a bawhchhiatna nia an sawi inkhel vawi 11 zinga vawi riatah hian a khel ve a, vawi thum erawh a khelh ve lohna a ni tih a sawi.
“Folliot hi inkhel result tihdanglam kawngah te, pawisa inthapna avanga theihtawp chhuaha inkhelh duh loh vang te, ITIA thil chhui mek puih that duh loh vang te, result tidanglam thei tura player dangte pawisa hmanga tham te, khelhpui turte thuruk lo hriat ruk te leh thil finfiahna tur lo tihchhiat vang tein thubuai kan siamsak a ni,” tiin ITIA chuan an sawi.
October thlaah khan Anti-Corruption Hearing Officer (AHO) Amani Khalifa chuan Folliot an puhna thubuai 30 zinga 27-ah thiam loh a chantir a, hengte hian match 11 zinga match 10 a huam tel a ni.