Lai Autonomous District Council (LADC) inthlanpui neih zawh takah party mala sorkarna siam thei an awm loh hnuah, sorkar intawm siam turin ZPM leh MNF ten thawhhona thutlung an siam a, Lairam Legislature Party (LLP) an din.
ZPM leh MNF party-in thawhhona thuthlung siama LLP an dinah hian, Leader atan T. Zakunga, ZPM Legislature Party Leader an thlang a. Deputy Chief Executive Member, Chairman leh Executive member post pathum chu MNF Legislature Party-in an chang ang a, ZPM Legislature Party-in executive member post panga an chang ang a. A bak office holder post-te chu house leader leh MNF Legislature Party-te inbiakrawnna anga hnawh khah turin thuthlung an ziak.
LADC inthlanpui neihah khan MNF chuan MDC bial 25-ah seat riat lain, ZPM-in seat paruk an la thung.
LADC-a LLP leh ZPM Legislature Party-a leader ni bawk, T. Zakunga chuan Thawhtanni khan ZPM party chhung inkhawmah thu sawiin, “Mizoram kaihruai turin ZPM sorkar chak tak Pathianin min pe a, chutih laiin LADC-ah ZPM-in MDC member paruk chauh kan nei hi keini pawhin tlem kan tih rualin, Pathian remruatah kan ngai a ni. Inthlan zawhah sorkar din tumin Congress party nen ZPM PAC hmalaknain kan inbe zui a, uluk taka kan hotuten an ngaihtuah hnuah MNF Legislature Party nen sorkar ngelnghet zawk din theih a nih beiseiin inremna kan siam ta a ni,” a ti.
T Zakunga hian LADC-ah sorkar ngelnghet a awm theih loh avangin hmasawnna kawngah pawh an thuanawp phah hle a. Chuvangin, lungrual takin an hotute kaihhruaina hnuaiah sorkar thar din turin governor hnenah nimin tlai khan sorkarna an siam theih thu a thlen nghal dawn tih a sawi bawk.