AZL: Mihring kalna tura ruahman footpath-ah lirthei rei lo te chhung dah pawh phal a nih loh thu Aizawl Traffic SP Vanlalvena’n nimin khan hriattirna a tichhuak.
Aizawl Traffic SP chuan Aizawlah ni tinin lirthei a pung a, kea kalte tan a him zawk nan leh harsatna a siam loh nan lirthei neituten an lirthei hman dan leh dah/park danah fimkhur turin hriattirin mihring kalna tura ruahman footpath-a lirthei khalh emaw, dah/park emaw, kea kalte tana hnawk khawpa footpath rapa lirthei dah emaw hi dan hnuaiah khap tlat a ni a, dan bawhchhiate chu The Motor Vehicles Act, 1988 – Section 177-a hrem theih an nih avangin lirthei khalhtuten footpath-a lirthei dah lo turin a hriattir a, hei hian reilote dah zawk pawh a huam vek a ni.
Footpath-a lirthei dah/park hnawkte chu Traffic Control Room (Ph: 9366553559)-ah an lirthei thlalak, registration number langin, an dahna hmun nen hriattir zel turin a ngen bawk.