Prime Minister Narendra Modi-a kaihhruai sorkar chuan ni 100 inhlawhna tia hriat lar, Mahatma Gandhi National Rural Employment Guarantee Act 2005 (MGNREGA) chu Viksit Bharat—Guarantee for Rozgar & Ajeevika Mission (Gramin) VB—G RAM G BILL, 2025 hmanga thlak a tum mek.
Bill thar hi duan danah chuan ‘India-in kum 2047-a mahnia kea ding ram nih a tum tihhlawhtlin nan thingtlanga hna kalhmang siamin chhung tina thiam bik nei lo puitlingte kum khata ni 125 an inhlawhna tur a ni a; mihring tichakin thanna a siam ang a, inthlakna leh India thingtlangah hmasawnna leh rahbi dik a tuk theih nan’ tih a ni.
Thiam bik nei loten kum khata ni 125 an inhlawh hian khawtlang tana hlawkpui theih tur ang chi zel buaipui ang a. Thingtlang miten an chhawr theih tur hmunhma leh hmanraw siam te, sik leh sa uchuak tak thlen zel lohna tura him ang chi te, khawsakna nena inkaihhnawih thil tangkaite an siam dawn a ni.
Viksit Bharat—Guarantee for Rozgar & Ajeevika Mission (Gramin), VB—G RAM G BILL, 2025 hian state sorkar insenna erawh a titam dawn a. Centrally sponsored scheme-a kalpui tur niin hmarchhak leh Himalaya tlangdunga awm state leh union territtory (Uttarakhand, Himachal Pradesh leh Jammu & Kashmir) chuan sorkar laipui leh state sorkarin senson 90:10-a intum semin state dang zawngin 60:40-in an intum sem ang.
MGNREGA kha sorkar laipuiin senso zawng zawng a tum vek thung a, VB G Ram G-ah hian lo neihnaa hna a tam vanglai chuan inhlawhna siam a ni ve dawn lo thung.
Scheme hi sorkar laipuiin a din, Central Gramin Rozgar Guarantee Council-in a enkawl tur a ni a. Central council-ah hian chairperson, sorkar laipui leh state sorkar aiawh, Panchayati Raj Institution, inhlawhfa pawl aiawh leh khawtlanga hniam zawkte aiawh mi 15 aia tam lo an tel ang a, member-secretary chu sorkara joint secretary aia hniam a ni dawn lo bawk.
MGNREGA kha chu rural development ministry-in a enkawl tawp a ni a, a hranpaa buaipuitu tur council bik siam a ni lo.
Hna thawh leh hmalakna ena thlir turin state tinah state sorkarin state council a din ve dawn bawk a, hei hi State Gramin Rozgar Guarantee Council tih a ni ang.
VB—G RAM G BILL, 2025 hi a taka hman theih tur a la ni lo va, sorkarin parliament-ah pharh tawhin pawm a nih hnuah hman a ni dawn a. Ni 100 inhlawhna ang kha thlak thuai an tum a ni.