Juda sakhaw hun pawimawh lawmna hmangte Sydney-a Bondi Beach-a beih an nih hnuah Berlin, London leh New York telin khawvel hmun hrang hranga Hanukkah lawma hun hmannaah venhimna khauh taka kalpui a ni hlawm.
Berlin police chuan German khawpuia Brandenburg Gate leh a chhehvelah-a Hanukkah zan khatnaa bati hmasa ber an chhit enna hmun atan venhimna an tihchak thar thu an sawi.
“Sydney-a thil thleng avangin venhimna tihkhauh lehzual a ni a, kan thlithlai reng a, police thahnem tawk tak nen kan ti zel dawn,” tiin an thupuangtuin X-ah a tar lang.
New York Mayor Eric Adams pawhin New York City-a synagogue hrang hranga Hanukkah lawmnaah venhimna tha taka an kalpui thu X-ah a tar lang a. Warsaw-a synagogue lian berah pawh Pathianni zana hun hmanah a leta tam venhim hna thawktu dah an ni.
“Judaten him taka an chawlh hi an lawm theih kan duh a, vantlang huapa Menorah chhit pawh nuam taka an hman kan duh a ni,” tiin Adams chuan a sawi.
Berlin-a Brandenburg Gate-a hun hmanah hian Bondi Beach-a inpawng kahnaah mi 11 vel thite sunna hun pawh an hmang a, Australian thuneitute chuan Judate huatna avanga beihna niin an sawi.
Germany-ah hian Nazi Holocaust avangin Israel leh Juda laka mawhphurtu bik, Staatsraeson an siam a. Berlin-a synagogue leh Judate hmun dang ven chu an hna a nih rualin Hanukkah avang hian venhimna an tikhauh zual tih police thupuangtu chuan a sawi.
London-a Metropolitan Police pawhin venhimna an tihkhauh thar thu an sawi a, a kimchang erawh an sawi lo.
“Sydney-a thil thlengin a kungkaihte kan hre lo va, London-ah a thlen ve hlauhthawnawmna a awm kan hre lo va, kan police erawh tam zawk kan indah a, patrol leh Judate buaina buaipuitu tur pawh kan indah belh bawk,” tiin thu an chhuah.
French Interior Minister Laurent Nunez pawhin tual chhung thuneitute chu December 14 leh 22 inkara Hanukkah hman chhungin Juda hmunte veng uluk turin a hriattir tih a thupuangtuin a sawi.